Şimali Koreyadan tarixi addım: Narahatlıq doğuran nüvə qərarı

Şimali Koreyanın Cənubi Koreya ilə birləşmə hədəfindən rəsmi şəkildə imtina etdiyi məlum olub.

Qaynarinfo xəbər verir ki, yenilənmiş konstitusiyada Cənubi Koreyanın ölkənin sərhəd qonşusu kimi göstərildiyi qeyd edilib. Konstitusiyada Şimali Koreya lideri Kim Çen Inın nüvə qüvvələrinin komandanlığına sahib olduğu vurğulanıb.

Şimali Koreya Cənubi Koreya ilə birləşmə ifadələrini konstitusiyasından çıxararaq diqqət çəkən dəyişiklik həyata keçirib. Ölkə konstitusiyada yer alan "düşmən dövlət" doktrinasını yalnız öz ərazilərinin təsvirinə uyğun şəkildə yeniləyib.

AFP agentliyinin əldə etdiyi sənədə əsasən, yenilənmiş konstitusiya ilə Şimali Koreyanın artıq "vətənin yenidən birləşməsi" hədəfindən imtina etdiyi görünür. Şimali Koreya lideri Kim Çen Inın mart ayında Cənubi Koreyanı "düşmən dövlət" kimi xarakterizə etmişdi.

Dəyişdirilmiş konstitusiyada ölkənin ərazi təsnifatı da yenilənib. Sənəddə şimalda Çin və Rusiya, cənubda isə Koreya Respublikası sərhəd qonşuları kimi göstərilib.

Həmçinin sənəddə Şimali Koreyanın "heç bir halda öz ərazilərinə yönələn hər hansı pozuntuya icazə verməyəcəyi" qeyd olunub.

Yeni konstitusiyada ən diqqətçəkən dəyişikliklərdən biri nüvə silahları ilə bağlıdır. Mətndə açıq şəkildə bildirilir:

* Şimali Koreya lideri nüvə qüvvələrinə komandanlıq edir.
* Bu səlahiyyət lazım olduqda başqasına verilə bilər.

Bununla yanaşı, ölkə "məsuliyyətli nüvə silahına sahib dövlət" kimi təqdim olunaraq nüvə proqramının davam etdiriləcəyi rəsmən təsdiqlənib.

Yeni tənzimləmə ilə Kim Çen Inın statusu da yenilənib. Konstitusiyada:

* Kim rəsmi olaraq "dövlət başçısı" kimi təsvir edilib.
* Mətndən "ölkənin ali lideri" ifadəsi çıxarılıb.

Bu dəyişikliklə Dövlət İşləri Komissiyasının sədri vəzifəsi konstitusion iyerarxiyada ən yüksək mövqeyə yüksəldilib.

Telegramda izləyin