Aldığı təzə avtomobili ekspertizaya aparan kişi həyatının şokunu yaşadı

İstanbulda sıfır kilometre aldığı avtomobili satmaq istəyərkən ekspertiza nəticələri ilə qarşılaşdığı uyğunsuzluqlara görə çətin vəziyyətdə qalan Engin Siyah, həm avtomobilin geri qaytarılmasını tələb etdiyini, həm də məhkəməyə müraciət edəcəyini açıqlayıb.

Sonxeber.az xarici mediaya istinadən xəbər verir ki, 2025-ci ilin əvvəlində İstanbuldakı rəsmi dillerdən Peugeot Rifter markalı avtomobili alıb. Təxminən bir ildən sonra avtomobili satmaq istəyən sahib, alıcının tələbi ilə ekspertiza yoxlaması etdirib. Yoxlama zamanı avtomobilin sol ön qapısında sökülüb-yığılma əməliyyatı və yüksək mikron səviyyəsində boya izləri aşkar edilib.

Bu vəziyyəti avtomobili aldığı dillerə bildirən Siyah, Trabzondakı rəsmi servisdə yoxlanışa yönləndirilib. Burada aparılan baxışda da qapıda sökülmə-yığılma və boya əməliyyatı olduğu qeyd edilib.

Şikayətdən sonra avtomobil ikinci dəfə yoxlanılıb. Lakin bu dəfə fərqli nəticə ortaya çıxıb. Rəsmi servisin hazırladığı ikinci hesabatda boya qalınlığının zavod standartları daxilində olduğu və hər hansı təmir izinə rast gəlinmədiyi bildirilib.

Baş verənləri şərh edən Engin Siyah ekspertiza nəticəsini görəndə böyük təəccüb yaşadığını deyib: "Avtomobili sıfır almışam, belə bir şey mümkün deyil dedim. Rəsmi servisdə də eyni sözləri eşidəndə şoka düşdüm".

İkinci hesabatda vəziyyətin "normal" kimi qiymətləndirilməsinə etiraz edən avtomobil sahibi, nəqliyyat vasitəsinin dəyər itirmədiyi bildirilsə də, dillerin avtomobili geri qəbul etmədiyini vurğulayıb. "Bu mənim 19-cu avtomobilimdir, ilk dəfə belə hallarla qarşılaşıram. Artıq bu avtomobili sürmək istəmirəm", - deyə o əlavə edib.

Siyah bildirib ki, problemi həll olunmasa, hüquqi addımlar atacaq və lazım gələrsə, avtomobili aldığı дилerin qarşısına qoyacaq.

Telegramda izləyin