4-cü sinif buraxılış tədbirində 9 yaşlı uşaq güllələnib - VİDEO

Türkiyənin Batman şəhərində məktəb tədbiri zamanı 9 yaşlı uşaq havalı tüfəngdən açılan atəş nəticəsində yaralanıb. H

Sonxeber.az xarici mediaya istinadən xəbər verir ki, hadisə 19 Mayıs məhəlləsində yerləşən Gənclik Parkında baş verib. Müəllim, valideyn və şagirdlərin iştirakı ilə 4-cü sinif şagirdləri üçün buraxılış tədbiri təşkil olunub. Tədbir zamanı dostları ilə oynayan M.N.A. adlı 9 yaşlı uşaq parkda olan yeniyetmələrdən birinin havalı tüfəngi boş hesab edərək atəş açması nəticəsində ayağından yaralanıb.

Hadisədən sonra şübhəlilər qaçıb. Əraziyə polis və təcili tibbi yardım briqadaları cəlb olunub. Yaralı uşaq müəllimlərinin müşayiəti ilə xəstəxanaya aparılıb və müalicəyə götürülüb.

Uşağın atası Seyithan A. bildirib ki, oğlunun həyati təhlükəsi yoxdur, lakin güllənin çıxarılması üçün əməliyyat olunacaq:

"Sinif yoldaşları ilə birlikdə buraxılış tədbiri keçirirdilər. Parkda oturarkən 13-14 yaşlarında iki uşaq gəlib oğlumun ayağına atəş açıb. Müəllimləri dərhal onu xəstəxanaya çatdırdılar. Məktəbin və müəllimlərin heç bir səhlənkarlığı olmayıb. Onlara təşəkkür edirəm. Bu hadisəni törədənlərin tezliklə tutulub ədalətə təhvil verilməsini istəyirik", - deyə ata bildirib.

Hadisə ilə bağlı araşdırma aparılır, qaçan iki yeniyetmənin saxlanılması istiqamətində əməliyyat tədbirləri davam etdirilir.

Telegramda izləyin