Kiçik mənzil üçün ideal 5 pişik cinsi

Bir çox insan kiçik mənzildə yaşadığı üçün evdə pişik saxlamaq fikrindən vaz keçir. Halbuki əsas məsələ mənzilin ölçüsü deyil, heyvanın xarakteridir və bu da böyük ölçüdə onun cinsindən asılıdır. Bəzi pişiklər hiperaktiv olur qaçmağa, tullanmğa, hündür yerlərə dırmaşmağa ehtiyac duyur. Digərləri isə sakit xarakterə malikdir və onlar üçün yumşaq divan hər hansı böyük ərazidən daha vacibdir.

Lent.az bu 5 pişik cinsini təqdim edir:

Britaniya qısatüklü pişiyi

Bu cins pişiklər şkafların üstünə tullanmağı, əşyaları rəflərdən salmağı və gecəyarısı mənzildə qaçmağı sevmir. Onların əsas məşğuliyyəti uzanmaq və ətrafı izləməkdir istər pəncərədən küçəyə baxmaq, istər sahibini müşahidə etmək.

Günün ən böyük fəaliyyəti bir yataq yerindən yem qabına keçmək ola bilər. Lakin bir məqama diqqət etmək lazımdır: az hərəkətli olduqları üçün artıq çəki yığmağa meyllidirlər. Gündə təxminən 10 dəqiqə oyun bu problemin qarşısını almağa kömək edir. Britaniya qısatüklü pişiklər müstəqil xarakterlidir və tək qalmağa yaxşı dözür. Gün ərzində işdə olan insanlar üçün yaxşı seçim sayılır.

Ragdoll

Bu cinsin adı "bez kukla" mənasını verir və bu təsvir tam yerinə düşür. Onu qucağa götürdükdə bədəni tam rahatlaşır və yumşaq şəkildə sahibinin qucağında "ərir". Bu pişiklər məhz ev şəraitində yaşamaq üçün yetişdirilib və mənzil həyatına ideal uyğunlaşır.

Xarakterləri mehriban və etibarlıdır. Ancaq vacib bir detal var: Ragdoll pişikləri tənhalığı ağır keçirir. Əgər evdə tez-tez heç kim olmursa, iki pişik götürmək daha məqsədəuyğundur ki, bir-birinə yoldaş olsunlar.

Pers pişiyi

Pers pişikləri sanki dekorativ heyvan təsiri bağışlayır: uzun ipək kimi tüklər, yastı sifət və sakit davranış. Onlar çox hərəkətli deyil və ov instinkti zəifdir. Buna görə kiçik mənzildə özlərini rahat hiss edirlər. Lakin uzun tüklər gündəlik qulluq tələb edir. Müntəzəm daranmadıqda tüklər dolaşır və evdə tökülmə artır.

Şotland visloux pişiyi

Bu pişiklərin xarakteri görünüşü kimi yumşaq və sakitdir. Aqressiv davranış göstərmirlər, çox diqqət tələb etmirlər və mənzildə dominantlıq etməyə çalışmırlar. Şotland visloux pişikləri uşaqlarla və digər heyvanlarla yaxşı yola gedir. Onlar həm müstəqillik, həm də mehribanlıq arasında balans yaradır.

Ekzotik qısatüklü pişik

Bu cinsi "qısatüklü pers pişiyi" kimi təsvir etmək olar. Xaraktercə sakitdir, mehribandır, amma gündəlik daranmaya ehtiyac duymur. Bir yaşdan sonra daha sakit həyat tərzinə üstünlük verir, oyunlara marağı azalır. Tənhalığa nisbətən yaxşı dözür və kiçik mənzil üçün ideal seçim sayılır.

Kiçik mənzil üçün uyğun olmayan pişik cinsləri

Benqal pişiyi çox enerjili, qaçmağa və ov etməyə ehtiyac duyur;

Abissin pişiyi daim hərəkətdə olur və interaktiv oyuncaqlar tələb edir;

Siam pişiyi və orientallar çox səsli və aktiv ola bilər;

Meyn-kun iri ölçülü olduğu üçün dar məkanlarda rahat olmaya bilər.

Pişik üçün əsas məsələ mənzilin ölçüsü deyil, vertikal məkanın olmasıdır. Rəflər, dırmaşma platformaları, pişik evləri və müxtəlif səviyyəli cızma dirəkləri hətta kiçik studiya mənzilini belə pişik üçün ideal məkana çevirə bilər. Sığallanan, qidalanan və özünü təhlükəsiz hiss edən pişik demək olar ki, hər ölçülü evdə xoşbəxt ola bilər.

Telegramda izləyin