ABŞ hərb nazirinin tənqidinə NATO-dan cavab gecikməyib

Avropadan ABŞ-nin müdafiə xərclərini artırmaq tələblərinə reaksiya gəlib.

Oxu.Az xəbər verir ki, bu barədə NATO-nun Hərbi Komitəsinin sədri admiral Cuzeppe Kavo Draqone "Bloomberg" agentliyinə açıqlama verib.

Onun sözlərinə görə, NATO-nun müdafiə sahəsində inkişaf planı mövcuddur və bu plan müdafiə xərclərinin ümumi səviyyəsini ÜDM-in 5%-nə çatdırmağa imkan verəcək.

Admiral bu bəyanatla Pentaqon rəhbəri Pit Heqsetin Sinqapurda keçirilən "Şanqri-La Dialoqu" beynəlxalq təhlükəsizlik forumunda Avropanı və NATO-nu kəskin tənqid etməsindən qısa müddət sonra çıxış edib. Nazir Asiyadakı müttəfiqləri tərifləyib və ABŞ-nin Çinlə sabit münasibətlərini yüksək qiymətləndirib, Qərbi Avropanın bunu nəzərə almalı olduğunu vurğulayıb.

Qeyd edək ki, Tramp administrasiyası dünyanın müxtəlif bölgələrindəki müttəfiqlərdən müdafiə xərclərini artırmağı və regional təhlükəsizlik üçün məsuliyyət götürməyi tələb edib. Bu, NATO müttəfiqlərini Avropanın müdafiəsini gücləndirməyə və ABŞ-dən asılılığı azaltmağa sövq etsə də, Vaşinqton Asiya ilə əməkdaşlığını davam etdirərək hərbi koordinasiyanı dərinləşdirib.

Keçən il keçirilən mühüm NATO sammitində İspaniya istisna olmaqla bütün müttəfiqlər ümumi daxili məhsulun 3,5%-ni müdafiəyə, əlavə 1,5%-ni isə əlaqəli təhlükəsizlik sahələrinə xərcləməyi öhdələrinə götürüblər. Bir sıra müttəfiqlər, ilk növbədə Almaniya, o vaxtdan bəri xərclərini artırıb və Ankarada keçiriləcək növbəti sammitdə əldə edilmiş irəliləyişi nümayiş etdirmək niyyətindədirlər.

Telegramda izləyin