Hakkaridə nəhəng gürzə ilanı görüntülənib - VİDEO

Türkiyənin Hakkari vilayətinin Durankaya qəsəbəsində təbiətsevərlər dəniz səviyyəsindən 2700 metr yüksəklikdə nəhəng gürzə ilanı ilə qarşılaşıblar.

Sonxeber.az xarici mediaya istinadla xəbər verir ki, hadisə Durankaya qəsəbəsinə bağlı Pınarbaşı ərazisində baş verib. Təbiətsevərlər Ferhat Reisoğlu və Cangir Ayva işkın və göbələk toplamaq üçün dağlıq əraziyə gedərkən qayalıqlar arasında iri ölçülü ilan görüblər.

Bir müddət ilanı müşahidə edən şəxslər təhlükəsiz məsafədən onun görüntülərini mobil telefon vasitəsilə qeydə alıblar.

Görüntülərdəki ilanın bədən quruluşu və ölçülərinə əsasən onun Türkiyənin ən zəhərli ilan növlərindən biri hesab edilən gürzə olduğu ehtimal edilir. Qayalıq ərazidə günəşlənən ilan bir müddət sonra gözdən itib, təbiətsevərlər isə ərazidən uzaqlaşıblar.

Mütəxəssislərin sözlərinə görə, gürzə ilanları əsasən daşlıq və qayalıq ərazilərdə yaşayır. Şərqi Anadolu bölgəsində geniş yayılmış bu növ Hakkaridə daha əvvəl də dəfələrlə müşahidə olunub.

Mütəxəssislər xüsusilə yay aylarında yayla və kənd ərazilərinə üz tutan vətəndaşları qayalıq və sıx otlu sahələrdə daha diqqətli olmağa çağırırlar.

Telegramda izləyin