Atasından qaçan əqli məhdudiyyətli şəxs dərədə ağacdan asılı vəziyyətdə tapılıb - VİDEO

Türkiyənin Nevşehir şəhərində əqli məhdudiyyətli olduğu bildirilən şəxs atasından qaçarkən dərəyə düşərək ağacda asılı vəziyyətdə qalıb.

Sonxeber.az xarici mediaya istinadla xəbər verir ki, hadisə 15 İyul məhəlləsinin 152-ci küçəsində baş verib. Məlumata görə, S.B. ailəsi ilə birlikdə hərəkətdə olarkən avtomobildən düşərək qaçmağa başlayıb. Atası onu saxlamağa çalışsa da, bir müddət buna nail ola bilməyib.

Qaçdığı zaman Combuz dərəsinə düşən S.B. ağacda asılı vəziyyətdə qalıb. Hadisə yerinə polis, təcili tibbi yardım, yanğınsöndürmə və AFAD əməkdaşları cəlb olunub.

Xilasedicilərin uzun sürən əməliyyatından sonra S.B. təhlükəli vəziyyətdən çıxarılıb. Ona hadisə yerində ilkin tibbi yardım göstərildikdən sonra xəstəxanaya aparılıb.

Hadisə ilə bağlı araşdırma aparılır. S.B.-nin atasından qaçdığı anlar isə ərazidəki müşahidə kameraları tərəfindən qeydə alınıb.

Telegramda izləyin