Polisin çevik müdaxiləsi faciənin qarşısını aldı - VİDEO

Türkiyənin Kayseri şəhərinin Kocasinan rayonunda polis əməkdaşlarının operativ müdaxiləsi nəticəsində bir nəfərin həyatını xilas etmək mümkün olub.

Sonxeber.az türk mediasına istinadən xəbər verir ki, iddialara görə, həyat yoldaşından ayrıldıqdan sonra psixoloji gərginlik yaşayan şəxs yaşadığı evdə bıçaqla özünə xəsarət yetirməyə başlayıb. Hadisə barədə məlumat alan polis əməkdaşları dərhal ünvana yollanıblar.

Mənzilin qapısının içəridən kilidləndiyini müəyyən edən hüquq-mühafizə orqanlarının əməkdaşları qapını kart vasitəsilə bir qədər aralayaraq içəridə baş verənləri yoxlamağa çalışıblar. Polis əməkdaşları mobil telefonun kamerasını qapının aralığından içəri uzadaraq şəxsin özünə xəsarət yetirdiyini görüblər.

Vəziyyətin ciddi olduğunu anlayan polis əməkdaşları vaxt itirmədən qapını sındıraraq mənzilə daxil olub və həmin şəxsə müdaxilə ediblər. Bununla da daha ağır nəticələrin qarşısı alınıb.

Hadisə yerinə çağırılan tibb işçiləri yaralıya ilkin yardım göstərdikdən sonra onu xəstəxanaya çatdırıblar.

Faktla bağlı araşdırma aparılır.

Telegramda izləyin