Karib dənizində tarixi kəşf: 300 illik əsl quldur gəmiləri tapıldı

Əfsanəvi dəniz quldurlarının cinayət izlərini gizlətmək üçün istifadə etdiyi sərt üsullar suyun altında üzə çıxıb. Quldurların ələ keçirdikləri gəmiləri qarət etdikdən sonra su xəttinə qədər yandıraraq okean dibinə batırdıqları iddia edilən qalıqlar, yüzillər sonra ilk dəfə araşdırılıb.

Qaynarinfo xəbər verir ki, Bahamın paytaxtı Nassaunun ətraf sularında dərin dalışlar həyata keçirən dəniz arxeoloqları dəniz dibində basdırılmış altı tarixi batıq aşkar ediblər.

Bu gəmilərdən üçünün 1680-1720-ci illər arasında, quldurluğun ən intensiv dövründə istifadə olunduğu müəyyən edilib. Tədqiqatçılara görə, suyun altında əsrlərdir qalan bu taxta qalıqlar həmin dövrün sərt izlərini aydın şəkildə qoruyur.

Aşkar edilən ilk batıq Nassaunun əsas limanının mərkəzində yerləşir. Suyun altındakı qalıqlarda ilk diqqət çəkən element gəmini sabit saxlayan iri ballast daşlarıdır. Bu daşların gəmi omurgasının yanmış hissələri üzərində yığılması, güclü hücuma və qəsdən məhv etmə əməliyyatına işarə edir.

Mütəxəssislərin fikrincə, quldurlar ələ keçirdikləri gəmilərdəki qiymətli yükü və topları öz gəmilərinə köçürdükdən sonra sübutları yox etmək üçün qalan hissəni yandıraraq batırırdılar. Yanmış qalıqlar arasındakı taxta konstruksiya elementləri həmin gəminin 1700-cü illərin əvvəllərində inşa edildiyini göstərir.

Kolonial administrasiyalarının zəifliyi və korrupsiya şəbəkəsi Karib dənizini quldurlar üçün əlverişli məkana çevirmişdi. Edvard Tiç və Kaliko Cek kimi məşhur dəniz quldurları Nassaunu baza kimi istifadə edirdilər. Dövrün qubernatoru Vuds Rocers 1718-ci ildə liman yaxınlığında 40 gəminin batırıldığını qeyd etsə də, bu batıqlar uzun müddət tapılmamışdı. İndi isə xüsusi icazə ilə riskli zonaya daxil olan tədqiqatçılar bu boşluğu doldura biliblər.

Limanın yanmış batığından əlavə, Nassaudan 35 kilometr şərqdə tək dirəkli başqa bir quldur gəmisi də aşkar edilib. Gəmidə böyük göyərtə topu və döyüş zamanı istifadə edilən döner müdafiə silahı tapılıb. Bundan əlavə, üç top mərmisi, 25 tüfəng gülləsi və silahların itilənməsi üçün daş aşkar olunub. Ticarət yükünün olmaması bu sürətli gəminin birbaşa quldurlara məxsus olduğunu təsdiqləyir.

Köhnə bir körpünün altında, aqressiv bir buğa köpəkbalığının yuva qurduğu ərazidə tapılan üçüncü batıq isə quldurluq dövründən sonrakı mərhələyə işıq tutur. Gəmidə Londonda istehsal olunmuş və Britaniya krallıq gerbi olan çoxsaylı tütün çubuqları və şərab şüşələri aşkar edilib. Gəminin qum sahilinə oturaraq batdığı ehtimal olunur.

Bu tapıntılar, quldurluq təhlükəsinin azaldığı dövrdə belə adanın ticarət həyatının sürətlə bərpa olunduğunu göstərir.

Telegramda izləyin