Bank işçisi 70 yaşlı kişini 960 minlik dələduzluqdan xilas edib

Türkiyənin Nevşehir şəhərində bank əməkdaşının diqqəti 70 yaşlı vətəndaşın böyük məbləğdə pulunu dələduzlara verməsinin qarşısını alıb.

Sonxeber.az xarici mediaya istinadla xəbər verir ki, Avanos rayon sakini Nuri Çekinirə zəng edən şəxslər özlərini polis əməkdaşı kimi təqdim edərək onun şəxsiyyət vəsiqəsi məlumatlarından qanunsuz istifadə edildiyini, adına saxta şirkət açıldığını bildiriblər. Göndərilən saxta sənədlərlə inandırılan yaşlı kişi evində topladığı 960 min lirəni göstərilən hesaba köçürmək üçün bank şöbəsinə yollanıb.

Müştərinin davranışlarından şübhələnən bank əməkdaşı polisə məlumat verib. Hadisə yerinə gələn hüquq-mühafizə orqanlarının əməkdaşları kişiyə vəziyyəti izah etdikdən sonra o, dələduzluğun qurbanı olmaqdan son anda xilas olub və şübhəlilərdən şikayətçi olub.

Nuri Çekinir bildirib ki, zəng edən şəxslər ona polisə kömək etdiyini deyərək məsələni heç kimlə paylaşmamağı tapşırıblar. O, yalnız həqiqi polis əməkdaşları banka gəldikdən sonra aldadıldığını anlayıb.

Hazırda polis şübhəlilərin müəyyən edilərək saxlanılması istiqamətində araşdırmaları davam etdirir.

Telegramda izləyin