İnsanların cinayət xəbərlərinə göstərdiyi yüksək marağın psixoloji səbəbləri nədir? - AÇIQLAMA

Son illər cinayət xəbərləri sosial şəbəkələrdə və media platformalarında ən çox oxunan mövzular sırasında yer alır. Xüsusilə qəddar və ya müəmmalı hadisələr cəmiyyətin diqqətini daha çox cəlb edir.

Bəzən insanlar belə xəbərləri narahatlıqla izləsələr də, onları oxumaqdan və ya müzakirə etməkdən çəkinmirlər.

Bəs insanların cinayət xəbərlərinə göstərdiyi bu yüksək marağın psixoloji səbəbləri nədir?

Psixoloq Gülsər Qədirli bu barədə Sonxeber.az -a açıqlama verib:

"İnsanların cinayət xəbərlərinə maraq göstərməsi insan beyninin təhlükələri əvvəlcədən müəyyənləşdirmək və onlardan qorunmaq instinkti ilə əlaqəlidir. İnsan beyni təhlükə yaradan hadisələrə adi xəbərlərdən daha çox diqqət ayırır. Bu, təkamül prosesindən gələn müdafiə mexanizmidir.

İnsanlar cinayət hadisələrini izləməklə özlərini həmin vəziyyətlə müqayisə edir və şüuraltı şəkildə "belə bir hadisə mənim başıma gəlsə nə edərdim?" sualına cavab axtarırlar. Bu səbəbdən xüsusilə müəmmalı və ya qeyri-adi cinayətlər daha çox maraq doğurur.

Psixoloq qeyd edir ki, bəzi hallarda bu maraq sadəcə təhlükəsizlik hissi ilə deyil, həm də insanın naməlum olanı anlamaq istəyindən qaynaqlanır. İnsanlar hadisənin səbəblərini, cinayəti törədən şəxsin motivlərini və nəticələrini öyrənməyə çalışırlar. Bu isə təbii maraq hissinin bir hissəsidir.

Davamlı olaraq zorakılıq və cinayət məzmunlu xəbərlərə məruz qalmaq insanlarda narahatlıq, qorxu və dünyanı daha təhlükəli yer kimi qəbul etmə hissini gücləndirə bilər. Buna görə də belə xəbərlərin izlənilməsində balansın qorunması vacibdir".

Telegramda izləyin