Bal ayından qayıdan gənc, qəzaya yardım etmək istəyərkən faciəvi şəkildə öldü

Türkiyənin Bursa şəhərində baş verən faciəvi hadisədə yol qəzasında yaralanan sürücüyə kömək etmək istəyən gənc həyatını itirib.

Sonxeber.az xarici mediaya istinadla xəbər verir ki, hadisə Mudanya rayonunda qeydə alınıb.

İdarəetməni itirən sürücünün avtomobili yol kənarındakı elektrik dirəyinə çırpılıb. Zərbənin təsirindən dirək aşıb, yüksək gərginlik xətti qırılaraq yolun üzərinə düşüb.

Bu zaman hadisə yerindən keçən Furkan Alan avtomobilini saxlayaraq yaralı sürücüyə kömək etmək istəyib. O, bir tərəfdən 112 Təcili Yardım xidmətinə zəng edərək məlumat verib, digər tərəfdən isə sürücüyə doğru qaçarkən qaranlıqda yola düşmüş yüksək gərginlik xəttini görməyib. Elektrik naqilinə toxunan gənc cərəyan vurması nəticəsində hadisə yerində həyatını itirib.

Hadisə yerinə cəlb olunan polis və təcili tibbi yardım briqadaları Furkan Alanın öldüyünü müəyyən ediblər. Qəzada xəsarət alan sürücü isə xəstəxanaya çatdırılıb.

Məlumata görə, Furkan Alan cəmi bir həftə əvvəl ailə həyatı qurmuşdu. O, həyat yoldaşı ilə bal ayından həmin gün Bursaya qayıtmış və qardaşını iş yerindən götürmək üçün yola çıxmışdı. Hadisə ilə bağlı araşdırma aparılır.

Telegramda izləyin