Bakıda evdə GÜCLÜ PARTLAYIŞ: Yaralıların sayı 4-ə çatdı, ölən var - FOTO - VİDEO

Bu gün saat 08:40-da Respublika Təcili və Təxirəsalınmaz Tibbi Yardım Mərkəzinə Bakı şəhəri, Yasamal rayonu, Ümid Ələkbərov küçəsində yerləşən yaşayış evində partlayış hadisəsi baş verməsi ilə əlaqədar çağırış qeydə alınıb.

Bu barədə Oxu.Az-ın sorğusuna cavab olaraq, TƏBİB-dən məlumat verilib.

Bildirilib ki, çağırış ünvanına təcili tibbi yardım briqadası cəlb olunub.

Təcili tibbi yardım briqadası tərəfindən 3 nəfər (2 qadın, 1 kişi) termiki yanıq diaqnozu ilə Nərimanov Tibb Mərkəzinin nəzdində olan Yanıq Mərkəzinə hospitalizasiya olunub.

Zəruri tibbi xidmət göstərilən pasiyentlərin müalicələri Reanimasiya şöbəsində davam etdirilir, vəziyyətləri ağır qiymətləndirilir.

Qeyd edək ki, hadisə baş verən ərazidən keçərkən 1 nəfər də (qadın) xəsarət alıb. Kliniki Tibbi Mərkəzin Təcili tibbi yardım şöbəsinə hospitalizasiya olunan pasiyentə zəruri tibbi xidmət göstərilib. Hazırda müalicəsi davam etdirilir, vəziyyəti stabildir, ambulator müalicə üçün evə buraxılması planlaşdırılır.

11:46

Bakıda evdə baş verən partlayışın təfərrüatı məlum olub.

Oxu.Az-ın məlumatına görə, hadisə Yasamal rayonu, Ümid Ələkbərov küçəsindəki ikimərtəbəli evdə baş verib. İlkin ehtimala görə, partlayışa səbəb qaz sızması olub.

İkimərtəbəli ev bir nəfərə məxsus olsa da, bir müddət əvvəl evi 4 ailəyə satıblar. Partlayış baş verən mənzildə ölən və xəsarət alanlar isə bir ailənin üzvləri olublar. Evdə ana və 3 övladı yaşayırmış. Ailə bir ay əvvəl evə köçübmüş.

Partlayış baş verən zaman ailə üzvləri yatmış vəziyyətdə olublar. Partlayış nəticəsində 4 nəfərin hamısı dağıntılar altında qalıb. Onlardan 3 nəfəri sağ çıxarılsa da, bir nəfər aldığı xəsarətlərdən dünyasını dəyişib.

11:33

Bakıda baş verən partlayışda ölən şəxsin kimliyi məlum olub.

Oxu.Az-ın məlumatına görə, ölən şəxs 2010-cu il təvəllüdlü Zəhra Pərvin qızı İsrafilovadır.

Hadisə zamanı evdə 4 nəfər - ana və 3 övladı olub. Z.İsrafilova partlayış olan otaqda olduğundan hadisə nəticəsində dağıntılar altında qalaraq ölüb.

Ailənin daha bir üzvü isə dağıntılar altından sağ çıxarılıb.

11:25

Bakı şəhəri, Yasamal rayonu, Ümid Ələkbərov küçəsində partlayış baş verən evə tamamilə yararsız vəziyyətə düşüb.

Oxu.Az həmin evdən görüntüləri təqdim edir:

10:39

Bakı şəhəri, Yasamal rayonu, Ümid Ələkbərov küçəsində yerləşən yaşayış evində partlayış baş verib.

Oxu.Az xəbər verir ki, bu barədə Fövqəladə Hallar Nazirliyi (FHN) məlumat yayıb.

Bildirilib ki, məlumatla əlaqədar dərhal əraziyə FHN-in Dövlət Yanğından Mühafizə və Xüsusi Riskli Xilasetmə xidmətlərinin qüvvələri cəlb olunub.

Hadisə yerində əməliyyat şəraitinin ilkin qiymətləndirilməsi zamanı ikimərtəbəli yaşayış evinin birinci mərtəbəsində yanğınla müşayiət olunan partlayışın baş verdiyi müəyyən olunub.

Yanğınsöndürənlərin operativ müdaxiləsi sayəsində yanğın genişlənməsinə imkan verilmədən qısa müddətdə söndürülüb.

Yanğın nəticəsində ayrı-ayrı vətəndaşlara məxsus ümumi sahəsi 250 kvadratmetr olan evin birinci mərtəbəsində yerləşən iki otağın yanar konstruksiyaları 50 kvadratmetr sahədə yanıb.

Hadisə nəticəsində 3 nəfər müxtəlif dərəcəli bədən xəsarətləri alıb, xilasedicilər tərəfindən 2010-cu il təvəllüdlü vətəndaşın meyiti çıxarılaraq aidiyyəti üzrə təhvil verilib.

Hadisə ilə əlaqədar müvafiq qurumlar tərəfindən araşdırma aparılır.

Telegramda izləyin