Yetişmiş qarpızı necə seçmək olar?

Yay mövsümünün sevilən meyvələrindən olan qarpızı seçərkən onun qabığındakı kiçik bir ləkə meyvənin yetişmə dərəcəsi və dadı haqqında vacib məlumat verə bilər.

Lent.az xarici mediaya istinadən xəbər verir ki, qarpızın qabığında görünən açıq rəngli ləkə meyvənin böyümə zamanı torpaqla təmasda olan hissəsində yaranır.

Günəş işığı həmin nahiyəyə düşmədiyi üçün burada yaşıl piqment əmələ gəlmir və ləkə açıq rəngdə qalır.

Mütəxəssislərin sözlərinə görə, qarpızın alt hissəsində yerləşən bir ədəd hamar və bərk ləkə tamamilə normaldır. Lakin onun rəngi və ölçüsü qarpızın yetişmə səviyyəsini göstərən əsas əlamətlərdən biridir.

Əgər bu ləkə kiçik və ya çox açıq, demək olar ki, ağ rəngdədirsə, bu, qarpızın vaxtından əvvəl dərildiyini göstərə bilər. Belə meyvələrin içi adətən dadsız və kifayət qədər şirin olmur.

Əksinə, ləkə parlaq sarı və ya narıncı rəngdədirsə, bu, qarpızın tarlada uzun müddət yetişdiyini və daha şirin olacağını göstərir.

Mütəxəssislər xəbərdarlıq edirlər ki, qabıq üzərində bir neçə boz və ya ağ rəngli, yumşaq, selikli və ya kifə bənzər ləkələr görünərsə, bu artıq torpaq izi deyil. Belə əlamətlər meyvənin çürüməyə başladığını göstərə bilər.

Qarpızın qabığı başqa hansı məlumatları verir?

Qabıq üzərindəki quru qəhvəyi torabənzər izlər arıların çiçəyi tez-tez tozlandırmasının nəticəsidir. Belə izlər nə qədər çox olarsa, qarpızın şəkər tərkibinin də bir o qədər yüksək olduğu hesab edilir.

Yetişmiş qarpızın qabığı adətən tünd yaşıl və tutqun olur. Əgər qabıq parlaq və həddindən artıq hamar görünürsə, bu, meyvənin tam yetişmədiyinə işarə edə bilər.

Mütəxəssislər həmçinin bildirirlər ki, yumru formalı qarpızlar adətən daha şirin və şirəli olur. Uzunsov formada və ölçüsünə görə yüngül olan qarpızların isə içi daha sulu və dadsız ola bilər.

Yetişmiş qarpızı necə seçmək olar?

Qarpız alarkən əvvəlcə alt hissəsindəki ləkəyə baxmaq tövsiyə olunur. Onun iri və parlaq sarı və ya narıncı rəngdə olması üstünlük hesab edilir.

Sonra qabığın tünd yaşıl, tutqun olmasına və üzərində quru qəhvəyi torabənzər izlərin olmasına diqqət yetirmək lazımdır. Yumşaq, boz və ya kifli görünən ləkələri olan qarpızları almaq məsləhət görülmür.

Saplaq hissəsi də vacib göstəricidir. Qurumuş və büzüşmüş saplaq qarpızın tam yetişdiyini göstərir. Yaşıl və nəm saplaq isə meyvənin vaxtından əvvəl dərildiyinə işarə edə bilər.

Sonda isə eyni ölçülü qarpızlar arasında ən ağır olanını seçmək tövsiyə edilir. Qabığına yüngül vurduqda yetişmiş qarpız gur, aydın və zəngli səs çıxarır, küt səs isə meyvənin tam yetişmədiyini göstərə bilər.

Telegramda izləyin