Dənizə girmək qadağasına baxmayaraq faciə: 1 nəfər ölüb, 2 nəfər itkin düşüb - VİDEO

Türkiyənin Şilə rayonunda güclü dalğa və rip axını səbəbindən dənizə girmək qadağan edilsə də, qadağan olunmuş ərazilərdə suya daxil olan 3 nəfər axına düşüb. Hadisə nəticəsində bir nəfərin meyiti tapılıb, daha iki nəfərin axtarışları davam edir.

Bu barədə Sonxeber.az xarici mediaya istinadla xəbər verir.

Şilə Kaymakamlığının qərarına əsasən, əlverişsiz hava şəraiti, yüksək dalğalar və təhlükəli rip axını səbəbindən yerli vaxtla saat 11:00-dan etibarən Ayazma və Ağva Mərkəz çimərlikləri istisna olmaqla, rayonun bütün sahillərində dənizə girmək qadağan olunub.

Lakin qadağaya baxmayaraq, Sofular və Akçakese ərazilərində dənizə girən 24 yaşlı İsa Bodur, Ahmet Can Yavuz və Umut Gümüş güclü axına düşərək gözdən itib.
Hadisə yerinə cəlb olunan Sahil Mühafizəsi əməkdaşları havadan və dənizdən genişmiqyaslı axtarış-xilasetmə əməliyyatı başladıb. Aparılan axtarışlar nəticəsində Ahmet Can Yavuzun meyiti sudan çıxarılıb.

Hazırda dalğalar arasında itkin düşən İsa Bodur və Umut Gümüşün tapılması üçün axtarış-xilasetmə işləri davam etdirilir. Çətin hava və dəniz şəraitində həyata keçirilən əməliyyatlar dron vasitəsilə də görüntülənib. Qruplar itkin düşən şəxslərə çatmaq üçün həm havadan, həm də dənizdən fasiləsiz fəaliyyət göstərir.

Telegramda izləyin