Torpaq mübahisəsi silahlı qarşıdurmaya çevrildi: Ev və əkin sahəsi yandırıldı - VİDEO

Türkiyənin Şanlıurfa vilayətində torpaq mübahisəsi zəminində iki ailə arasında baş verən silahlı qarşıdurma zamanı bir ev və əkili kənd təsərrüfatı sahəsi yandırılıb.

Sonxeber.az xarici mediaya istinadla xəbər verir ki, hadisə səhər saatlarında Haliliye rayonunun Yeşilyurt məhəlləsində qeydə alınıb. İddialara görə, torpaq üstündə mübahisə edən iki ailənin üzvləri arasında yaranan mübahisə qısa zamanda silahlı davaya çevrilib. Sosial şəbəkələrdə yayılan mobil telefon görüntülərində tərəflərin tapança və uzun lüləli silahlardan qarşılıqlı atəş açdığı əks olunub.

Hadisə zamanı kimliyi hələlik məlum olmayan şəxs tərəfindən bir yaşayış evi və əkili ərazi də yandırılıb. Əraziyə daxil olan jandarma və yanğınsöndürmə briqadaları alovun qarşısını alaraq yanğını söndürüblər.

İlkin məlumata görə, insident nəticəsində ölən və ya xəsarət alan olmayıb. Jandarma ərazidə geniş təhlükəsizlik tədbirləri görüb və hadisədə iştirak edən şübhəlilərin saxlanılması istiqamətində araşdırmalara başlayıb.

Telegramda izləyin