Həyat yoldaşının meyitini parçalayıb zibilə atan qadın: "Üzərimdə 40 ilin zülmü var"

Türkiyənin Bursa şəhərində həyat yoldaşının meyitini parçalayıb müxtəlif zibil qutularına atmaqda təqsirləndirilən 69 yaşlı Adalet U.-nun məhkəmə prosesi başlayıb.

Sonxeber.az xarici mediaya istinadla xəbər verir ki, Bursa 9-cu Ağır Cinayətlər Məhkəməsində keçirilən iclasda "həyat yoldaşını qəsdən öldürmə" ittihamı ilə ağırlaşdırılmış ömürlük azadlıqdan məhrumetmə cəzası tələb olunan təqsirləndirilən şəxs ifadə verib.

Adalet U. müdafiəsində bildirib ki, səhər yuxudan gec oyandıqdan sonra zibili atmaq üçün aşağı enərkən həyat yoldaşını yerdə hərəkətsiz vəziyyətdə görüb. Onun reaksiya vermədiyini deyən qadın axşama qədər gözlədiyini, daha sonra isə qorxuya düşdüyünü söyləyib.

"Onun ölümündə məni günahlandıracaqlarından qorxdum. Meyitin altına torba sərdim, baltaya bənzər alətlə hissələrə ayırdım", - deyə o məhkəmədə ifadə verib.

Təqsirləndirilən şəxs əvvəllər qurban kəsdiyi üçün meyiti parçalamaqda çətinlik çəkmədiyini bildirib. Onun sözlərinə görə, meyit bərkimiş vəziyyətdə olduğundan qan axmayıb. Qadın meyiti hissələrə ayırma prosesinin təxminən 5-6 saat davam etdiyini, daha sonra qalıqları 5-10 torbaya yerləşdirərək gecə saatlarında müxtəlif zibil qutularına atdığını deyib.

Adalet U. hadisədən sonra geyimlərini yuduğunu, istifadə etdiyi aləti və torbaları da zibilə atdığını bildirib. O, yaşadığı qorxu səbəbindən oğullarına heç nə demədiyini, daha sonra isə birlikdə polisə müraciət edərək həyat yoldaşının itkin düşməsi ilə bağlı məlumat verdiklərini qeyd edib.

Məhkəmədə çıxışı zamanı qadın illər boyu həyat yoldaşının ona pis rəftar etdiyini iddia edərək, "Üzərimdə 40-50 ilin zülmü var idi", - deyə bildirib.

İş üzrə məhkəmə araşdırması davam edir.

Telegramda izləyin