11 yaşlı uşağa timsah hücum etdi, atasının müdaxiləsi həyatını qurtardı

ABŞ-ın Florida ştatında atası ilə balıq ovuna çıxan 11 yaşlı Brodi Terri timsahın hücumuna məruz qalıb.

Sonxeber.az xarici mediaya istinadla xəbər verir ki, hadisə Umatilla şəhərində baş verib. Məlumata görə, Brodi tutduğu balığı yenidən suya buraxmaq istəyərkən təxminən 2,6 metr uzunluğunda timsah qəfil suyun altından çıxaraq onun qolundan yapışıb.

Oğlunun qışqırıqlarını eşidən ata dərhal suya atılaraq timsahla mübarizəyə başlayıb və uşağı onun caynağından xilas etməyə müvəffəq olub. Həkimlərin səylərinə baxmayaraq, ağır xəsarət alan Brodinin sağ əlini xilas etmək mümkün olmayıb və biləkdən amputasiya edilib.

Müalicəsi başa çatan uşaq xəstəxanadan evə buraxılıb. Ailə yaxınları bildiriblər ki, atanın cəsarətli müdaxiləsi olmasaydı, hadisə daha faciəvi nəticələnə bilərdi.

Telegramda izləyin