18 yaşlı qızı bıçaqlayıb telefonunu oğurlayan şəxs məhkəmə qərarı ilə azadlığa buraxılıb - VİDEO

Türkiyənin İzmir vilayətinin Kemalpaşa rayonunda 18 yaşlı qonşusunu təqib edərək bıçaqlamaq və mobil telefonunu qəsb etməkdə təqsirləndirilən şəxs barədə verilmiş həbs hökmü apellyasiya instansiyasında ləğv edilib. Yenidən baxılan iş üzrə yerli məhkəmə onun ölkədən çıxışına qadağa qoyulması və məhkəmə nəzarəti şərti ilə azadlığa buraxılmasına qərar verib.

Sonxeber.az xarici mediaya istinadla xəbər verir ki, hadisə 2024-cü il oktyabrın 25-də Mustafa Kemal Atatürk məhəlləsində baş verib. İddiaya əsasən, həmin vaxt 16 yaşında olan Çağlar Efe D. bir müddətdir təqib etdiyi 18 yaşlı qonşusu Betül Ç.-ni küçədə izləyib. Təqib olunduğunu anlayan gənc qız qaçmağa çalışsa da, şübhəli ona bıçaqla hücum edib. Nəticədə Betül Ç. bədəninin müxtəlif nahiyələrindən, o cümlədən boyun hissəsindən xəsarətlər alıb.

İddialara görə, hücumdan sonra şübhəli zərərçəkənin mobil telefonunu da götürərək hadisə yerindən qaçıb. Ətrafdakı şəxslərin məlumatı əsasında hadisə yerinə polis, jandarma və təcili tibbi yardım briqadaları cəlb olunub. Xəstəxanaya çatdırılan Betül Ç. müalicə aldıqdan sonra evə buraxılıb.

Hadisədən bir gün sonra Çağlar Efe D. polis və jandarmanın birgə əməliyyatı nəticəsində atasının evində saxlanılıb. Axtarış zamanı qızdan qəsb edildiyi bildirilən mobil telefon da aşkarlanaraq götürülüb. Şübhəli barəsində məhkəmənin qərarı ilə həbs qətimkan tədbiri seçilmişdi.

Məlumata görə, o, təxminən 1 il 9 ay həbsdə qaldıqdan sonra məhkəmənin qərarı ilə ölkədən çıxışına qadağa və məhkəmə nəzarəti şərti ilə azadlığa buraxılıb. İzmir Respublika Prokurorluğu isə bu qərardan apellyasiya qaydasında şikayət verib.

Telegramda izləyin