Məşhur bloqer yardım videolarında süni intellektdən istifadə edib?

İslamı qəbul etdikdən sonra xeyriyyə fəaliyyəti və dini paylaşımları ilə tanınan, sosial şəbəkələrdə 3 milyona yaxın izləyicisi olan avstraliyalı bloqer Lily Jay haqqında diqqətçəkən iddialar irəli sürülüb. Araşdırmaya əsasən, onun ianə toplamaq məqsədilə paylaşdığı bəzi yardım videolarının süni intellekt vasitəsilə hazırlandığı, həmçinin Uqandada fəaliyyət göstərdiyi deyilən uşaq evi və Qəzzada açıldığı iddia olunan çörəkxana ilə bağlı müstəqil təsdiqedici sübutların tapılmadığı bildirilib.

Sonxeber.az xarici mediaya istinadla xəbər verir ki, keçmişdə burlesk rəqqasəsi kimi fəaliyyət göstərən Lily Jay Hinson İslamı qəbul etdikdən sonra sosial mediada dini məzmunlu paylaşımları və humanitar təşəbbüsləri ilə geniş auditoriya qazanıb. O, təsis etdiyi Lily Jay Foundation vasitəsilə Uqandada uşaq evi və Qəzza zolağında çörəkxana yaratdığını bildirərək müxtəlif kampaniyalar çərçivəsində ianələr toplayırdı.

Lakin Avstraliya Yayım Korporasiyasının (ABC) News Verify araşdırma qrupu tərəfindən aparılan yoxlama zamanı fondun paylaşdığı bəzi videoların süni intellekt texnologiyası ilə hazırlandığı müəyyən edilib. Araşdırmada həmçinin Uqandada fəaliyyət göstərdiyi iddia edilən uşaq evi və Qəzzada açıldığı deyilən çörəkxananın mövcudluğunu təsdiqləyən müstəqil və etibarlı sübutların aşkar edilmədiyi qeyd olunub.

İddiaların yayılmasından sonra Lily Jay Foundation məsələ ilə bağlı açıqlama verərək süni intellektdən yalnız məhdud sayda tanıtım materialının hazırlanmasında istifadə edildiyini bildirib. Fond nümayəndələri humanitar fəaliyyətlərin real olduğunu və ianələrin nəzərdə tutulan məqsədlər üçün istifadə edildiyini müdafiə ediblər.

Hadisə sosial şəbəkələrdə geniş müzakirələrə səbəb olub. Bir çox istifadəçi ianə kampaniyalarında şəffaflığın vacibliyini vurğulayaraq iddiaların hərtərəfli araşdırılmasına çağırıb. Hazırda səsləndirilən ittihamlarla bağlı rəsmi araşdırmanın nəticələri və ya hüquqi qərar açıqlanmayıb.

Telegramda izləyin