13 yaşlı qızın hicabla hovuza girməsinə mane olan rus qadın həbs edildi

Türkiyənin Antalya vilayətinin Alanya rayonunda yaşayış kompleksinin ümumi istifadə üçün nəzərdə tutulmuş hovuzunda baş verdiyi bildirilən hadisə ictimaiyyətin geniş müzakirəsinə səbəb olub. İddialara görə, 13 yaşlı qızın hicab ilə hovuza daxil olmasına saytın Rusiya vətəndaşı olan idarəçisi mane olub.

Sonxeber.az xarici mediaya istinadla xəbər verir ki, 64 yaşlı Ludmina İ. yeniyetməyə geyiminin hovuzu çirkləndirdiyini bildirərək hovuza girməsinə icazə verməyib. Hadisədən sonra qızın ağlayaraq ailəsinə baş verənləri danışdığı, yaxınlarının isə hüquq-mühafizə orqanlarına müraciət etdiyi bildirilir.

Hadisə ilə bağlı sosial şəbəkələrdə paylaşımlar yayıldıqdan sonra məsələ geniş rezonans doğurub. Bir çox istifadəçi baş verənləri geyim azadlığı və dini etiqada hörmət baxımından tənqid edib.

Hüquq-mühafizə orqanlarının apardığı araşdırma çərçivəsində saxlanılan Ludmina İ. məhkəməyə çıxarılıb. Məhkəmənin qərarı ilə barəsində həbs qətimkan tədbiri seçilərək istintaq dövrü üçün cəzaçəkmə müəssisəsinə göndərilib.

Hadisə ilə bağlı istintaq davam edir. Rəsmi qurumlar tərəfindən irəli sürülən ittihamların mahiyyəti və araşdırmanın nəticələri ilə bağlı əlavə məlumatın veriləcəyi gözlənilir.

Telegramda izləyin