Həyat yoldaşının burnunu dişləyərək qopardı

Türkiyənin Manisa vilayətinin Turqutlu rayonunda ailə münaqişəsi dəhşətli hadisə ilə nəticələnib.

Sonxeber.az xarici mediaya istinadla xəbər verir ki, Yıldırım məhəlləsində yerləşən Badem küçəsində gecə saat 23:00 radələrində Gökhan G. ilə həyat yoldaşı İmran G. arasında hələlik naməlum səbəbdən mübahisə yaranıb. Qısa müddətdə davaya çevrilən münaqişə zamanı kişi həyat yoldaşının burnunu dişləyərək qopardıb.

Hadisə səslərini eşidən qonşular dərhal 112 Təcili Yardım Mərkəzinə məlumat veriblər. Əraziyə polis, təcili tibbi yardım və yanğınsöndürmə briqadaları cəlb olunub.

Mənzilin qapısı açılmadığı üçün xilasedicilər təhlükəsizlik tədbirləri görüblər. Ehtimal olunan təhlükəyə qarşı binanın qarşısında xilasetmə döşəyi quraşdırılıb. Yaralı qadın yanğınsöndürənlərin nərdivanı vasitəsilə eyvandan təxliyə edilib.

Polis əməkdaşları isə yanğınsöndürənlərin köməyi ilə mənzilə daxil olaraq Gökhan G.-ni saxlayıblar.

İmran G. Turqutlu Dövlət Xəstəxanasında ilkin tibbi yardım aldıqdan sonra plastik cərrahiyyə müalicəsi üçün Manisa Celal Bayar Universitetinin Hafsa Sultan Xəstəxanasına göndərilib.

Hadisə zamanı evdə olan 5 və 7 yaşlı iki qız uşağının vəziyyətinin yaxşı olduğu bildirilib.

Şübhəlinin polis tərəfindən evdən çıxarılması zamanı hadisəyə etiraz edən sakinlərlə hüquq-mühafizə orqanlarının əməkdaşları arasında qısa müddətli qarşıdurma yaşanıb.

Faktla bağlı araşdırma davam etdirilir.

Telegramda izləyin