Nəsli kəsilmək təhlükəsində olan maral böcəyi sakinlər tərəfindən görüntülənib - VİDEO

Türkiyənin Manisa vilayətinin Gördes rayonunda nəsli kəsilmək təhlükəsi altında olan və qorunan növlər sırasında yer alan maral böcəyi (Lucanus cervus) görüntülənib.

Sonxeber.az xarici mediaya istinadla xəbər verir ki, Beğel məhəlləsində yaşayan fermer Rəcəb Şener əkin sahəsində işləyərkən nadir rast gəlinən böcəklərlə qarşılaşıb. O, maral böcəklərini mobil telefonu ilə lentə alıb, onlara zərər vermədən yenidən təbii yaşayış mühitinə buraxıb.

Mütəxəssislərin sözlərinə görə, maral böcəkləri çürümüş ağacların parçalanmasına kömək edərək torpağın məhsuldarlığının qorunmasında və meşə ekosisteminin davamlılığında mühüm rol oynayır. İnsanlar üçün tamamilə zərərsiz hesab edilən bu növ bioloji müxtəlifliyin vacib hissəsidir.

Rəcəb Şener digər fermerlərə də müraciət edərək, nəsli kəsilmək təhlükəsi altında olan bu böcəkləri öldürməməyə və onları zərər vermədən təbii mühitə buraxmağa çağırıb.

Telegramda izləyin