Argentinanın Dünya çempionatının finalındakı uğursuzluğu iki təqaüdçü üçün faciə ilə nəticələndi

Dünya çempionatının finalını izləyərkən Argentinadan olan iki yaşlı kişi ürək tutmasından vəfat edib.

Lent.az-ın xarici mediaya istinadən məlumatına görə, Buenos-Ayres Təcili Tibbi Yardım Xidməti (SAME) Dünya çempionatının finalı zamanı ürək tutmasından iki nəfərin öldüyünü təsdiqləyib. Ölənlər 67 və 88 yaşlı kişilərdir. Digər bir nəfər isə ağır vəziyyətdə xəstəxanaya yerləşdirilib.

Bu azarkeşlərdən biri ürək-ağciyər reanimasiyası cəhdlərinə baxmayaraq təcili yardım çağırdıqdan sonra evdə vəfat edib.

İkinci kişi də oxşar problemlə üzləşib, lakin beş saatlıq reanimasiyadan sonra xəstəxanada ölüb.

72 yaşlı üçüncü azarkeş hazırda ağır vəziyyətdə reanimasiyadadır.

Bundan əlavə, Buenos-Ayresin mərkəzindəki Obeliskdə toplaşan onlarla azarkeşin tibbi yardıma ehtiyacı olub.

Orada bir kişi təxminən dörd metr hündürlükdən yıxılaraq sol ayağının sınığı və çıxığı ilə xəstəxanaya yerləşdirilib.

Spirtli içki intoksikasiyası və travma ilə bağlı çoxsaylı hallar da qeydə alınıb və yıxılma və dava nəticəsində üz və ya burun nahiyəsində yaralar və xəsarətlər alanlara əlavə yardım göstərilib.

Telegramda izləyin