"Instagram" bəhanəsi ilə 14 min dollar oğurladı - VİDEO

İndoneziyanın Bali adasında baş verən dələduzluq hadisəsi sosial şəbəkələrdə geniş rezonans doğurub. Kriptovalyuta investoru tanış olduğu qadına "Instagram" hesabını əlavə etməsi üçün kilidi açıq telefonunu verdikdən sonra 14 min dollar zərərə düşüb.

Sonxeber.az türk mediasına istinadən xəbər verir ki, iddialara görə, qadın telefondan istifadə etdiyi bir neçə saniyə ərzində investorun kriptovalyutalarını başqa bir hesaba köçürüb. Bir müddət sonra hesabındakı vəsaitin yoxa çıxdığını anlayan investor qadından izahat tələb edib.

Hadisə yerində çəkilən görüntülərdə kişinin qadına əsəbi şəkildə etiraz etdiyi, oğurlanan vəsaitlə bağlı onu sorğu-suala tutduğu əks olunub. Lakin qadın ittihamları qəbul etməyib və qısa müddət sonra hadisə yerindən qaçıb.

Baş verən hadisə təhlükəsizlik kameraları və mobil telefon vasitəsilə lentə alınıb. Görüntülər sosial şəbəkələrdə sürətlə yayılaraq geniş müzakirələrə səbəb olub.

Hadisə ilə bağlı hüquq-mühafizə orqanlarının araşdırma apardığı bildirilir. Bu hadisə şəxsi məlumatların və rəqəmsal aktivlərin qorunmasının vacibliyini bir daha gündəmə gətirib.

Telegramda izləyin