Tarlada yatan fermerin köynəyinə kobra girdi - VİDEO

Hindistanda lentə alındığı bildirilən görüntülərdə tarlada yatmış bir fermerin köynəyinin içinə kobranın girdiyi iddia olunur.

Sonxeber.az xarici mediaya istinadla xəbər verir ki, hadisə zamanı fermerin yaxınlığında olan şəxslər onun təşvişə düşməməsi üçün sakit qalmasını istəyib və ilanı təhlükəsiz şəkildə çıxarmaq üçün böyük ehtiyatla hərəkət ediblər.

Kadrlarda fermerin ilanın onu sancmaması üçün uzun müddət demək olar ki, tərpənmədən arxası üstə uzandığı görünür. Bu vaxt ətrafdakılar köynəyin düymələrini bir-bir açaraq geyimi ehtiyatla çıxarıb və kobraya çatmağa çalışıblar.

Təxminən dörd dəqiqə davam edən müdaxilədən sonra fermerin köynəyi tamamilə çıxarılıb. Əməliyyat boyunca ətrafdakılar ilanın aqressivləşməsinin qarşısını almaq üçün son dərəcə diqqətli davranıblar.

Görüntülərin sonunda fermerin ayağa qalxdığı və ilan tərəfindən sancılmadan xilas olduğu görünür.

Hadisənin Hindistanın hansı bölgəsində baş verdiyi, eləcə də kobranın sonradan necə uzaqlaşdırıldığı barədə isə rəsmi məlumat açıqlanmayıb.

Telegramda izləyin