"Ağız qoxusunun əsas səbəbi həmişə mədə deyil" - AÇIQLAMA

"Ağızdan gələn xoşagəlməz qoxu (halitoz) əksər hallarda düşünüldüyü kimi mədə problemlərindən deyil, ağız boşluğunda baş verən proseslərdən qaynaqlanır".

Bunu Sonxeber.az-a Tibb üzrə fəlsəfə doktoru, həkim Ramin Qasımov danışıb.

O, açıqlamasında qeyd edib ki, ağız qoxusunun yaranmasının əsas səbəbi ağız suyunun azalmasıdır:

"Gecələr ağız suyu ifrazı kəskin azaldığı üçün səhərlər ağızdan gələn qoxu normal hal hesab olunur. Ağız boşluğunda yaşayan bakteriyalar qida qalıqlarındakı zülalları parçalayaraq kükürd və metilmerkaptan kimi üfunətli qazlar ifraz edir. Ağız suyu isə tərkibindəki oksigen sayəsində bu bakteriyaların çoxalmasının qarşısını alır.

Həyəcan, aclıq, uzun müddət danışmaq, ağızdan nəfəs almaq, stress və yaşın artması da ağız quruluğunu artıraraq ağız qoxusuna səbəb ola bilər.

Ağız qoxusunun ən geniş yayılmış səbəblərindən biri dilin üst səthində və diş ərpi altında toplanan bakteriyalardır. Buna görə yalnız dişləri deyil, dilin üst səthini, damağı və yanaqların daxili hissəsini də təmizləmək vacibdir. Dil çəhrayı rəngdə olmalıdır. Ağ ərp isə həmin nahiyədə milyonlarla bakteriyanın toplandığını göstərir.

Tərkibində spirt olan ağız yaxalayıcıları ağız boşluğunu quruda bildiyi üçün qoxunu daha da artıra bilər. Bu səbəbdən xlorheksidin tərkibli məhlullara üstünlük verilməsi daha məqsədəuyğundur.

Ağız qoxusunun qarşısını almaq üçün bol su qəbul etmək, şəkərsiz saqqız çeynəmək, ağız boşluğunun gigiyenasına diqqət yetirmək tövsiyə olunur. Duzlu su ilə qarqara etmək də bakteriyaların azalmasına və iltihabın qarşısının alınmasına kömək edə bilər.

Bəzi hallarda ağız qoxusu diafraqmal yırtıq, tənəffüs yollarının infeksiyaları, ağız quruluğu yaradan dərman preparatları, sərt pəhrizlər və hormonal dəyişikliklərlə də əlaqəli olur. Buna görə uzun müddət davam edən ağız qoxusu olduqda səbəb mütləq araşdırılmalı və həkim müayinəsindən keçilməlidir".

Telegramda izləyin