Elçin Cəlilovun məzarından yayılan görüntülər müzakirələr yaratdı - (Video)

Sosial şəbəkələrdə yayılan görüntülər izləyicilərin diqqətini çəkərək geniş müzakirələrə yol açıb.

Milli.Az xəbər verir ki, sosial media istifadəçisi Qurban Oruc mərhum sənətkar Elçin Cəlilovun baxımsız vəziyyətdə olan məzarını ziyarət edərək həmin anları lentə alıb. Daha sonra o və yaxınları məzarın ətrafında təmizlik və abadlıq işləri apararaq görülən işləri sosial şəbəkədə paylaşıblar.

Paylaşımda bildirilib ki, məqsəd kimisə ittiham etmək deyil, sənətkarın xatirəsinə hörmət əlaməti olaraq vəfa borcunu yerinə yetirməkdir.

"Bir zamanlar səsi ilə insanların qəlbinə toxunan sənətkarın məzarını bu vəziyyətdə görmək bizi çox kədərləndirdi. Heç kimi qınamaq üçün gəlməmişdik. Sadəcə, əlimizdən gəldiyi qədər məzarı təmizlədik, ətrafını abadlaşdırdıq və xatirəsinə ehtiramımızı ifadə etdik. İnsan dünyasını dəyişə bilər, amma onun xatirəsi yaşamalıdır. Ümid edirik ki, bu görüntülər hər kəsə yaxınlarını sağlığında daha çox qiymətləndirməyi, dünyasını dəyişənlərin isə məzarını ziyarət edib xatirələrini yaşatmağın vacibliyini xatırladar", - paylaşımda qeyd olunub.

Yayılan görüntülər qısa müddətdə çoxsaylı baxış toplayıb. İstifadəçilər mərhum sənətkarın xatirəsinə göstərilən ehtiramı təqdir edərək, bu cür təşəbbüslərin örnək olduğunu bildiriblər.

Telegramda izləyin