ABŞ Ukraynaya Yardım Qrupundakı liderliyindən imtina edə bilər

ABŞ Ukraynaya Yardım Qrupunda (SAG-U) təhlükəsizlik sahəsində aparıcı ölkə rolundan çıxa bilər.

Oxu.Az xəbər verir ki, bu məlumatı "Politico" nəşri öz mənbələrinə əsaslanaraq yayıb.

Məlumata görə, Pentaqon Ukraynaya hərbi dəstəyi əlaqələndirən və Almaniyada fəaliyyət göstərən NATO komandanlığına rəhbərlikdən imtina edir və bu addım ABŞ-nin əsas müttəfiqlərindən uzaqlaşmağa doğru atdığı növbəti əlamət kimi qiymətləndirilir.

Bildirilir ki, qrupun əlaqələndirici funksiyalarının Şimali Atlantika Alyansının digər bir üzvünə həvalə edilməsi nəzərdə tutulur. Nəşr qeyd edir ki, ABŞ-nin bu proqramın rəhbərliyindən imtinası onların Ukraynanın dəstəklənməsindəki rolunun və Avropa ilə münasibətlərinin dəyişdiyini göstərir.

Qrup daxilində gözlənilən bu dəyişikliklər silah təminatında ləngimə ehtimalları yaradaraq narahatlığa səbəb olur. Bunu qəzetə açıqlamasında ukraynalı rəsmi bildirib. O, eyni zamanda, ABŞ-yə məxsus kəşfiyyat məlumatlarının və logistika vasitələrinin əvəzedilməzliyini xüsusi qeyd edib.

Telegramda izləyin