İsrail Hizbullah terror təşkilatının obyektlərini bombaladı

İsrail ordusu Livanın cənubunda və Beyrutun cənub ətraflarında Hizbullah terror təşkilatına məxsus olduğu bildirilən hərbi obyektlərə hava zərbələri endirib.

Sonxeber.az ABC News-a istinadən xəbər verir ki, İsrail Müdafiə Qüvvələrinin məlumatına görə, əməliyyat Hizbullahın İsrailin şimalına doğru raket atəşləri açmasından sonra həyata keçirilib. İsrail tərəfi zərbələrin təşkilatın silah anbarları, hərbi infrastrukturu və digər obyektlərini hədəf aldığını açıqlayıb.

Livanın dövlət mediası hücumlar nəticəsində ölən və yaralananların olduğunu bildirib. Zərbələr əsasən Beyrutun cənub ətrafı və Livanın cənub bölgələrini əhatə edib.

Hadisə bölgədə onsuz da gərgin olan təhlükəsizlik vəziyyətini daha da kəskinləşdirib. Tərəflər bir-birini atəşkəsi pozmaqda ittiham edir, beynəlxalq ictimaiyyət isə vəziyyətin genişmiqyaslı qarşıdurmaya çevrilməməsi üçün təmkin nümayiş etdirməyə çağırır.

Telegramda izləyin