Bakıda "SSRİ təbliğatı"nın arxasında kimlər dayanır? - DETALLAR

Zaman-zaman SSRİ bayrağı ilə yürüş edən, tədbilərdə bu bayrağı dalğalandıran insanların cəzalandırıldığının şahidi oluruq. Sonuncu belə hadisədə biri tanınmış jurnalist olmaqla 4 nəfər həbs edildi. Bəs bu cür addımların, təbliğatın arxasında nə dayanır?

Mövzu ilə bağlı Sonxeber.az-a danışan politoloq, siyasi elmlər üzrə fəlsəfə doktoru Şəbnəm Həsənova bildirib ki, kimliyindən asılı olmayaraq, Azərbaycan oğullarının canı-qanı bahasına bərpa etdiyi bütöv torpaqlarımızda nəinki keçmiş imperiyanın, istənilən hər hansı bir bayrağın qaldırılmasını və dalğalandırılmasını qəti şəkildə qəbul etmir:

"Şübhəsiz ki, bu, Azərbaycan dövlətinə, onun bayrağına, yenidən bərpa etdiyimiz müstəqilliyimizə, yenicə bərpa etdiyimiz ərazi bütövlüyümüzə və suverenliyimizə qarşı hörmətsizlik, eyni zamanda təhdid etmə, sual və şübhə altına salmaq cəhdidir. Mən bunu fərdi kontekstdə dəyərləndirməzdim. Çünki bu hadisə birinci dəfə baş vermir. Silsilə şəklində davam edirsə, deməli, burada zəncirvari prosesdən və düşünülmüş addımlardan söhbət gedir. Məsələyə sadəcə dövlət kontekstində yanaşmaq da düzgün olmazdı. Bu, həm də şəhidlərimizə qarşı son dərəcə hörmətsiz yanaşmadır".
Politoloq qeyd edib ki, baş verən proseslər ilk olmadığından, bunu hüquq-mühafizə orqanlarımız araşdıracaq, bu istiqamətdə bütün detallar incələnəcək və bundan sonra lazımi tədbirlər görüləcək:

"Çünki Azərbaycanın təhlükəsizlik orqanları son dərəcə uğurlu və peşəkar iş ortaya qoyur. Bu, həm Vətən müharibəsində belə oldu, ondan sonrakı dövrdə də Azərbaycanın sabitliyinə və təhlükəsizliyinə yönələn bir neçə cəhd fonunda təhlükəsizlik orqanlarımızın son dərəcə peşəkar fəaliyyətinin şahidi olduq. Hadisə və proseslər təmkinlə araşdırılmalı, bu istiqamətdə də lazımi ölçülər götürülməlidir. İnsan əməlini dərk etməlidir, dərk etmirsə başa salmaq və mütləq lazımi tədbirlər alınmalıdır. İstər şimaldan, istər cənubdan, istərsə də qərbdən gələn bütün həmlələrə qarşı sayıq və aydın yanaşma ortaya qoymalıyıq".

Cavidan Mirzəzadə

Telegramda izləyin