"Siqaret çəkmək qadınlarda kişilərə nisbətən daha sürətli və ağır fəsadlar törədir" - AÇIQLAMA

Siqaret, dünya üzrə ən çox istifadə edilən tütün məhsulu kimi tanınır və hər il 5 milyondan çox insanın həyatını itirməsinə səbəb olan son dərəcə zərərli bir vərdişdir.

Siqaret çəkmək, dünya miqyasında qarşısı alına bilən qeyri-infeksion xəstəliklərin və bu xəstəliklərlə əlaqəli ölümlərin əsas səbəbidir. Siqaret tüstüsü 7.000-dən çox kimyəvi maddə ehtiva edir; bunlardan yüzlərlə zəhərli, 70-dən çoxu isə birbaşa xərçəng yaradan xüsusiyyətə malikdir.

Kadmium kimi batareyaların istehsalında istifadə olunan maddələr, bataqlıqlarda yüksək miqdarda olan metan qazı, kimya sənayesində geniş yayılmış zəhərli arsenik, həşərat dərmanlarında istifadə edilən nikotin, karbonmonoksit kimi zəhərli qazlar və ammonyak kimi maddələr siqaret tüstüsü vasitəsilə birbaşa insan orqanizminə daxil olur.

İnsan sağlamlığına son dərəcə zərərli olan bu kimyəvi maddələrdən biri də həşərat dərmanlarında istifadə edilən nikotindir. Nikotin, sinir sistemi üzərində güclü stimullaşdırıcı təsir göstərdiyi üçün, siqaret çəkən şəxslərdə zamanla həm psixoloji, həm də fiziki asılılıq yaranmasına səbəb olur. Xüsusilə də qadınlarda.

Mövzu ilə bağlı Sonxeber.az-a danışan Tibb elmləri doktoru, professor Adil Qeybulla bildirib ki, siqaret tək qadınların deyil kişilərin sağlamlığına mənfi təsir göstərir:

"İlk olaraq ürək-damar xəstəlikləri və insult riskini artırır. Ağciyərlərə zərər verir, xroniki tənəffüs problemləri və ağciyər xərçəngi riskini yüksəldir. Reproduktiv sağlamlığa mənfi təsir göstərə bilər. Hamiləlik dövründə siqaret çəkmək dölün inkişafına və körpənin sağlamlığına ciddi zərər verə bilər. Diş və ağız sağlamlığını pisləşdirir. Uzunmüddətli istifadə nikotin asılılığına səbəb olur.Passiv siqaret tüstüsü də həm siqaret çəkən qadına, həm də ətrafındakı insanlara zərər verə bilər.Xüsusilə yeniyetmə yaşlarında nikotin istifadəsi beyin inkişafına və asılılıq yaranmasına daha çox təsir göstərə bilər".

Professor vurğulayıb ki, siqaret çəkmək qadınlarda kişilərə nisbətən daha sürətli və ağır fəsadlar törədir:

"Tütün məmulatları hormonal balansı pozur, vaxtından əvvəl qocalmaya səbəb olur, sonsuzluq, süd vəzi xərçəngi, ağciyər xərçəngi və hamiləlik zamanı ağır fəsadlar riski yaradır. Siqaret çəkmək qadınlarda sonsuzluq və hamilə qalmaqda çətinlik riskini artıra bilər. Bu təsir nikotin və tütün tüstüsündəki digər zərərli maddələrlə əlaqəlidir. Siqaret yumurtalıqların fəaliyyətinə mənfi təsir göstərə bilər və yumurtalıq ehtiyatının daha tez azalması ilə əlaqələndirilir.Yumurtaların keyfiyyətinə zərər verə bilər.Hamilə qalma müddətini uzada bilər.Erkən menopauza riskini artıra bilər.Hamiləlik baş verdikdə düşük və digər hamiləlik ağırlaşmaları riskini yüksəldə bilər.Passiv siqaret tüstüsünə uzunmüddətli məruz qalmaq da reproduktiv sağlamlığa mənfi təsir göstərə bilər. Qeyd edim ki, siqaret çəkən hər qadın sonsuz olmur, lakin siqaret reproduktiv sağlamlıq üçün dəyişdirilə bilən risk faktorlarından biridir. Siqareti tərgitmək sağlamlıq üçün faydalıdır və hamiləlik planlaşdıran qadınlar üçün xüsusilə önəmlidir".

Telegramda izləyin