Bu hallarda işçinin maaşından tutulmalar EDİLƏ BİLƏR - AÇIQLAMA

Əmək münasibətlərində işçinin əməkhaqqından müxtəlif tutulmaların aparılması bəzən mübahisələrə səbəb olur və bu prosesin hüquqi əsasları ilə bağlı suallar yaradır. Qanunvericilik əməkhaqqından tutulmaların yalnız müəyyən edilmiş hallarda və konkret qaydalar çərçivəsində həyata keçirilməsinə icazə verir. Bəs, işəgötürən hansı hallarda işçinin əməkhaqqından tutulma apara bilər, bunun üçün hansı hüquqi əsaslar tələb olunur və işçilər öz hüquqlarını necə qoruya bilərlər?
Məsələ ilə bağlı Sonxeber.az-a açıqlama verən vəkil Cavanşir Qasımzadə bildirib ki, Azərbaycan Respublikasının Əmək Məcəlləsinin 175-ci maddəsinə əsasən, işçinin əməkhaqqından tutulmalar yalnız qanunvericilikdə nəzərdə tutulmuş hallarda və ya işçinin yazılı razılığı ilə həyata keçirilə bilər.

"İşəgötürənin özbaşına və ya əsassız şəkildə maaşdan tutulma etməsi qadağandır. Birinci halda, qanunla məcburi olan tutulmalar var ki, buraya gəlir vergisi, məcburi dövlət sosial sığorta haqqı, işsizlikdən və icbari tibbi sığorta haqları, habelə məhkəmə qərarları və icra sənədləri əsasında aliment və ya vurulmuş ziyanın ödənilməsi kimi tutulmalar daxildir.
İkinci halda isə işəgötürən müəyyən hallarda öz əmri ilə tutulma edə bilər".

Onun sözlərinə görə, bu hallara işçiyə verilmiş avansın vaxtında qaytarılmaması, mühasibatlıq tərəfindən hesablama səhvləri nəticəsində artıq ödənilmiş məbləğlərin geri tutulması, ezamiyyət və ya təsərrüfat xərcləri üçün verilən avansın artıq qalan hissəsinin vaxtında qaytarılmaması və işçi əmək ili bitməmiş işdən çıxdıqda qabaqcadan verilmiş işlənməmiş məzuniyyət günlərinə düşən məbləğin tutulması aiddir:

"Lakin işəgötürən bu əmri borcun qaytarılma müddətinin bitdiyi və ya yanlış hesablamanın edildiyi gündən ən geci bir ay ərzində verə bilər. Bu müddət ötürüldükdə və ya işçi tutulmanın əsaslığına yazılı etiraz etdikdə məsələ yalnız məhkəmə qaydasında həll olunmalıdır".

Vəkil bildirib ki, digər halda ziyanın ödənilməsi və ya digər ödənişlər üçün işçinin mütləq yazılı razılığı tələb olunur:

"İşəgötürən intizam tənbehi kimi əməkhaqqından cərimə tuta bilməz. Əmək Məcəlləsinin 176-cı maddəsinə əsasən tutulmaların maksimal həddi müəyyən edilib. Ümumi qaydada hər dəfə əməkhaqqı ödənilərkən tutulan məbləğ tam əməkhaqqının 20 faizindən, bir neçə icra sənədi olduqda, aliment ödənilərkən və ya sağlamlığa vurulmuş ziyan ödənilərkən isə 50 faizindən artıq ola bilməz".

Röyalə Xəyal

Telegramda izləyin