Yaxın dövrdə paytaxt Bakıdan Xankəndinə köçürülə bilər? - AÇIQLAMA

Bu gün müxtəlif rəsmi şəxslər tərəfindən paytaxtın köçürülməsilə bağlı təkliflər səsləndirilməkdədir. Təkliflər arasında paytaxtın Xankəndinə və digər işğaldan azad edilmiş şəhərlərə köçürülməsi təklif edilir.

Məsələ ilə bağlı Sonxeber.az-a danışan deputat Aydın Hüseynov bildirib ki, paytaxtın köçürülməsi bahalı və uzunmüddətli bir prosesdir:

"Son illərdə Azərbaycanın paytaxtının Bakıdan Xankəndiyə və ya başqa şəhərə köçürülməsi ilə bağlı müxtəlif fikirlər səslənib. Lakin hazırda paytaxtın Bakıdan Xankəndiyə köçürülməsi barədə qəbul edilmiş rəsmi qərar yoxdur.

Paytaxtın köçürülməsi ideyasının əsas səbəbləri Bakının həddindən artıq yüklənməsidir. Əhali, nəqliyyat və iqtisadi fəaliyyətin böyük hissəsinin Bakıda cəmlənməsi şəhər infrastrukturuna ciddi təzyiq yaradır.
Digər səbəb isə regionların inkişafı ilə bağlıdır. Paytaxtın başqa şəhərə köçürülməsi həmin ərazidə yeni iş yerlərinin, dövlət qurumlarının, xidmət sektorunun və infrastrukturun inkişafına təkan verə bilər. Xüsusilə də Qarabağın dirçəldilməsində. Xankəndi və digər Qarabağ şəhərlərinin inkişaf etdirilməsi Böyük Qayıdış və regionun iqtisadi potensialının artırılması baxımından əhəmiyyətlidir. Dövlət Şəhərsalma və Arxitektura Komitəsinin məlumatlarında Xankəndi Qarabağ iqtisadi rayonunun şəhərləri sırasında göstərilir. Yeni paytaxtın sıfırdan və müasir şəhərsalma prinsipləri əsasında qurulması mümkündür".

Deputat vurğulayıb ki, paytaxtın köçürülməsi məsələsi bir neçə dəfə Milli Məclisdə də gündəmə gətirilib:

"Bəzi həmkarlarım hesab edir ki, Bakıda xüsusilə maşınların sıxlığından və yeni binaların tikilməsindən sonra ekoloji vəziyyət pisləşib. Təklifə görə, Bakı Azərbaycanın yalnız biznes mərkəzi olmalı, digər icra və idarəetmə strukturları isə ayrıca paytaxta köçürülməlidir. Müzakirələrdə müxtəlif vaxtlarda Xankəndi, Ağdam, Gəncə və hətta yeni şəhərin salınması kimi variantlar səsləndirilib. Xankəndinin adı xüsusilə Qarabağın Azərbaycanın nəzarətinə qayıtmasından sonra gündəmə gəlib. Bununla belə, bəzi ekspert və deputatlar Xankəndinin paytaxt üçün coğrafi, nəqliyyat və digər baxımdan uyğunluğunu mübahisəli hesab edirlər. Paytaxtın birdən-birə köçürülməsindən daha real variant dövlət və iqtisadi funksiyaların mərhələli şəkildə regionlara yayılması ola bilər. Məsələn, müəyyən dövlət qurumlarının, şirkətlərin və yeni iqtisadi fəaliyyət sahələrinin Bakıdan kənarda yerləşdirilməsi həm Bakının yükünü azalda, həm də regionların inkişafını sürətləndirə bilər. Hazırda Bakı hazırda Azərbaycanın paytaxtıdır. Paytaxtın Xankəndiyə və ya başqa şəhərə köçürülməsi məsələsi gündəmdə deyil".

Telegramda izləyin