Azərbaycandan Rusiyaya pul köçürmələri DAYANDIRILDI - SƏBƏB

Son günlər Azərbaycandan Rusiyaya "Zolotaya Korona" ödəniş sistemi vasitəsilə pul köçürmələrinin müvəqqəti dayandırılması ilə bağlı məlumatlar vətəndaşlar arasında narahatlıq yaradıb. Belə məhdudiyyətlər xüsusilə iki ölkə arasında müntəzəm pul köçürmələrindən istifadə edən şəxslərin maliyyə əməliyyatlarına, eləcə də transsərhəd pul axınlarına təsir göstərə bilər.

Bəs, bu vəziyyət vətəndaşların pul göndərmə imkanlarına və Azərbaycan-Rusiya arasında maliyyə axınlarına necə təsir edə bilər və prosesin ölkə iqtisadiyyatı üçün mümkün nəticələri nələrdir?
Məsələ ilə bağlı Sonxeber.az-a açıqlama verən iqtisadçı ekspert Razi Abasbəyli bildirib ki, hazırkı məhdudiyyət ümumi xarakter daşıyır və əlbəttə ki, Rusiyadan Azərbaycana pul köçürmələrinə ciddi təsir göstərəcək:

"Xüsusilə Rusiyadan Azərbaycana ödənişlərin çətinləşməsi əlavə xərclərin yaranmasına səbəb ola bilər ki, bu da Azərbaycan iqtisadiyyatına müəyyən mənfi təsir göstərəcək amillərdən biridir. Bu, xüsusi və böyük qlobal çətinlik yaratmasa da, müəyyən mənfi fəsadları olacaq. Azərbaycandan Rusiyaya və ya Rusiyadan Azərbaycana təhsil, səhiyyə və digər zəruri ödənişlərlə bağlı ani pul köçürmələrində müəyyən məhdudiyyətlərin yaranması daha real görünür. Qısamüddətli dövr üçün bunun ciddi risk yaradacağını düşünmürəm. Lakin problem uzun müddət davam edərsə, ciddi fəsadlara səbəb ola bilər. Çünki Rusiyada yaşayan azərbaycanlıların sayı kifayət qədər çoxdur və Azərbaycana xaricdən daxil olan pul vəsaitlərinin əhəmiyyətli hissəsi Rusiyadan gəlir".

Ekspert bildirib ki, Mərkəzi Bank tərəfindən də açıqlanıb ki, bu, bankların həll etməli olduğu məsələdir:

"Yəni "Zolotaya Korona" sisteminin məhdudlaşdırılması və sanksiya təhlükəsinin mövcudluğu fonunda banklar alternativ həll yolları tapmalıdırlar. Banklar "Zolotaya Korona"ya alternativ ödəniş kanalları müəyyən etməli və həmin vasitələrlə müvafiq pul köçürmələrinin həyata keçirilməsini təmin etməlidirlər. Burada əsas məsələ bankların nə qədər operativ şəkildə alternativ yollar tapa bilməsidir. Banklar bu problemi nə qədər tez həll etsələr, pul köçürmələri üzrə mövcud dövriyyəni də bir o qədər yaxşı qoruyub saxlaya bilərlər. Əks halda, banklar operativ qərarlar qəbul edə bilməsələr, nəticə mənfi olacaq. Əgər bu problem uzun müddət davam edərsə, təbii ki, Azərbaycan iqtisadiyyatına daha geniş miqyasda mənfi təsir göstərə bilər".

Röyalə Xəyal

Telegramda izləyin