Rusiya Ukraynaya növbəti zərbələr endirdi: ölən və yaralananlar var

Rusiya ordusu Ukraynanın müxtəlif bölgələrinə raket və PUA-larla hücumlarını davam etdirir. Son hücumlar nəticəsində yaşayış binalarına və mülki infrastruktura zərər dəyib, ölən və yaralananlar barədə məlumat verilib.

"Reuters" xəbər verir ki, Rusiyanın son hücumlarından biri Xarkov şəhərində həyata keçirilib. Hücum nəticəsində çoxmərtəbəli yaşayış binasına zərər dəyib və şəhərdə itkilər qeydə alınıb. Ukrayna hakimiyyəti Rusiya qüvvələrinin həmçinin ölkənin digər bölgələrini də hədəfə aldığını bildirib.

Sonxeber.az Reuters-ə istinadən xəbər verir ki, bundan əvvəl, avqustun 8-də Kiyev vilayətinə endirilən Rusiya PUA zərbələri nəticəsində üç yaşlı uşaq və onun nənə-babası həlak olmuşdu. Hücum nəticəsində daha bir nəfərin öldüyü bildirilmişdi.

Rusiya son günlər Ukraynaya qarşı raket və PUA hücumlarını intensivləşdirib. Avqustun 5-də Kiyev və ətrafına həyata keçirilən genişmiqyaslı ballistik raket hücumu nəticəsində ən azı 17 nəfər ölmüşdü.

Ukrayna tərəfi Rusiyanın xüsusilə enerji, liman və digər strateji infrastrukturu hədəfə aldığını bildirir. Son hücumlar fonunda Kiyev hava hücumundan müdafiə sistemlərinə, xüsusilə əlavə Patriot komplekslərinə ehtiyacın artdığını vurğulayır.

Hazırda cəbhədə döyüşlərlə yanaşı, hər iki tərəfin uzaqmənzilli PUA və raketlərdən istifadə etdiyi qarşılıqlı zərbələr müharibənin əsas istiqamətlərindən biri olaraq qalır.

Telegramda izləyin