Bahalı avtomobil alarkən bunlara diqqət etmək lazımdır - Ekspert AÇIQLADI

Lüks avtomobil alarkən yüksək alış qiyməti ilə yanaşı, sonrakı texniki xidmət və təmir xərcləri də nəzərə alınmalı əsas məsələlərdəndir. Xüsusilə işlənmiş premium avtomobillərdə mühərrik, sürətlər qutusu, elektron sistemlər, pnevmatik və adaptiv asqı kimi mürəkkəb komponentlər yarandıqda təmir xərcləri ciddi məbləğlərə çata bilər.

Bəs, hansı lüks avtomobillər etibarlılıq və saxlanma xərcləri baxımından daha risklidir, alıcı avtomobili əldə etməzdən əvvəl mühərrik, yürüş, elektronika, kuzov və digər əsas sistemləri necə yoxlatdırmalı və sonradan gözlənilməz böyük xərclərlə üzləşməmək üçün hansı məqamlara xüsusi diqqət yetirməlidir?
Məsələ ilə bağlı Sonxeber.az-a açıqlama verən avtomobil mütəxəssisi Razil Nağıyev bildirib ki, lüks avtomobil alarkən sürücülər yalnız avtomobilin alış qiymətinə deyil, onun sonrakı texniki xidmət və təmir xərclərinə də diqqət yetirməlidirlər.

"Premium avtomobillərdə mühərrik, transmissiya, elektronika və asqı sistemləri daha mürəkkəb olduğundan, nasazlıq zamanı təmir xərcləri də yüksək ola bilər. Xüsusilə bəzi premium modellərində texniki xidmət və ehtiyat hissələrinin qiyməti yüksək ola bilər. Lakin risk yalnız markadan asılı deyil. Konkret model, mühərrik, istehsal ili, yürüş və avtomobilin əvvəlki texniki xidmət tarixçəsi daha böyük əhəmiyyət daşıyır".

Ekspert bildirib ki, avtomobil almadan əvvəl ilk növbədə VIN nömrəsi və servis tarixçəsi yoxlanılmalıdır:

"Qəza keçmişi, real yürüş, əvvəlki təmir işləri və servis məlumatları araşdırılmalıdır. Texniki baxış zamanı ən vacib məsələ mühərrikin vəziyyətidir. Mühərrik mümkün qədər soyuq halda işə salınmalı, işə düşməsi, qeyri-adi səslər, vibrasiya, tüstü, yağ və antifriz sızmaları, turbo və soyutma sisteminin vəziyyəti yoxlanılmalıdır. Mürəkkəb və turbo mühərriklərdə bu yoxlama xüsusilə vacibdir".

Onun sözlərinə görə, ikinci əsas məsələ transmissiyadır:

"Sürətlər dəyişdirilərkən zərbə, gecikmə, silkələnmə və ya qeyri-normal səslər olmamalıdır. Transmissiya ilə bağlı problemlərin təmiri lüks avtomobillərdə kifayət qədər bahalı ola bilər. Asqı sistemi, xüsusilə pnevmatik asqı olan avtomobillərdə, mütləq yoxlanılmalıdır. Avtomobil dayandıqdan sonra kuzovun bir tərəfinin aşağı düşməsi, kompressorun həddindən artıq işləməsi və ya asqının hündürlüyünün düzgün dəyişməməsi nasazlıq əlaməti ola bilər".

Ekspert qeyd edib ki, elektron sistemlərin diaqnostikası da vacibdir:

"Mühərrik və transmissiya ilə yanaşı, elektron idarəetmə bloklarında saxlanılan xətalar, ABS/ESP, airbag, radar və kamera sistemləri, parkinq sensorları, adaptiv kruiz-kontrol və digər əsas elektron funksiyalar yoxlanılmalıdır. Ən düzgün yanaşma avtomobili almamışdan əvvəl servis mərkəzində kompleks texniki diaqnostika etdirməkdir. Alıcı avtomobilin alış qiyməti ilə yanaşı, ilkin təmir və növbəti 1-2 il ərzində yarana biləcək texniki xidmət xərclərini də əvvəlcədən hesablamalıdır".

Röyalə Xəyal

Telegramda izləyin