Braziliyalı sosial media fenomeni köpəkbalığı hücumuna məruz qaldı - VİDEO

Braziliyalı sosial media fenomeni və vəkil Tayane Dalazen iştirak etdiyi dalış turu zamanı 2 metrdən uzun köpəkbalığının hücumuna məruz qalıb.

Sonxeber.az xarici mediaya istinadla xəbər verir ki, hadisə turistlər üçün təşkil olunan köpəkbalığı dalışı zamanı baş verib. 37 yaşlı Dalazen su altında olduğu anlarda baş verən dəhşətli hadisəni kameraya çəkib.

Dalazenin sözlərinə görə, dalış zamanı köpəkbalıqlarının davranışında qeyri-adilik hiss edib. O, heyvanların adətən olduğundan fərqli şəkildə hərəkət etdiyini və suyun səthinə daha yaxın üzdüyünü bildirib.

Fenomen daha sonra ərazidəki köpəkbalıqlarının turistlərlə yaxın təmasda olması üçün tur təşkilatçıları tərəfindən yemləndirildiyini öyrəndiyini deyib.

Dalış zamanı Dalazen qəfil bud nahiyəsində güclü təzyiq hiss edib. 2 metrdən uzun olduğu ehtimal edilən köpəkbalığı onun budundan dişləyərək bir neçə saniyə ərzində suyun altında saxlayıb. Daha sonra heyvan qadını buraxıb.

Dalazen öz gücü ilə sudan çıxmağı bacarıb. Hücum nəticəsində onun bud nahiyəsində dərin yaralar və kəsiklər əmələ gəlib.

Hadisənin görüntüləri sosial mediada yayılaraq böyük marağa səbəb olub. Dalazen isə həmin anlarda mümkün qədər sakit qalmağa çalışdığını bildirib.

Telegramda izləyin