Bu ərazilərdə torpaq qiymətləri BAHALAŞIR - AÇIQLAMA

Son illərdə Bakıya yaxın ərazilərdə və turizm potensialı yüksək regionlarda torpaq sahələrinə tələbin artması daşınmaz əmlak bazarında diqqət çəkən tendensiyalardan biridir. Xüsusilə yol, kommunal xidmətlər və turizm infrastrukturu layihələrinin genişlənməsi, fərdi yaşayış evlərinə marağın artması və torpağın uzunmüddətli investisiya aləti kimi qiymətləndirilməsi bu prosesə təsir edən əsas amillər sırasındadır.

Bəs, regionlarda torpaq sahələrinə tələbin artmasının arxasında hansı iqtisadi və sosial səbəblər dayanır və yeni infrastruktur layihələri, turizm investisiyaları, eləcə də bölgələrin inkişafı ilə bağlı dövlət proqramları torpaq qiymətlərinin gələcəkdə də yüksəlməsinə səbəb ola bilərmi?
Məsələ ilə bağlı Sonxeber.az-a açıqlama verən Azərbaycan Qiymətləndiricilər Cəmiyyətinin (AQC) sədri Vüqar Oruc bildirib ki, Bakıya yaxın ərazilərdə, eləcə də turizm potensialı olan bölgələrdə torpaq qiymətlərinin kəskin artmasının əsas səbəblərindən biri vaxta qənaət və insanların yaşadığı əraziyə daha yaxın istirahət məkanlarına üstünlük verməsidir:

"Uzaq məsafələrə getmək daha çox vaxt tələb etdiyindən vətəndaşlar daha qısa müddətdə istirahət etmək üçün Bakıya yaxın, turizm potensialı olan ərazilərdə torpaq sahələri əldə etməyə başlayıblar. Bu da qiymətlərin artmasına səbəb olur. Burada əsas amillərdən biri torpağın Bakıya yaxınlığıdır. Digər tərəfdən, torpağın gələcək inkişaf və gəlirlilik potensialı, investisiya baxımından cəlbediciliyi də qiymətə təsir göstərir. Vətəndaşları maraqlandıran əsas məsələlərdən biri də həmin torpaqlardan gələcəkdə turizm və gündəlik icarə məqsədilə istifadə etməkdir".

Ekspert bildirib ki, uzunmüddətli investisiya imkanları olan vətəndaşlar üçün də torpaq sahələri cəlbedicidir:

"Çünki torpaq uzunmüddətli qiymət artımı potensialı yüksək olan daşınmaz əmlak növlərindən biridir. Bununla yanaşı, aqroturizm, kənd təsərrüfatı məqsədli turizm və bağçılıq kimi yeni fəaliyyət istiqamətlərinin inkişafı da torpağa olan tələbi artırır. Dövlət qurumlarının və ayrı-ayrı təşkilatların həyata keçirdiyi layihələr, bölgələrə yatırılan investisiyalar da torpaq qiymətlərinə təsir göstərir. Eyni zamanda torpaq sahələrinin mühüm xüsusiyyətlərindən biri ondan ibarətdir ki, onların sahəsini artırmaq mümkün deyil. Məsələn, köhnə binanı söküb yerində daha böyük bina inşa etmək mümkündür və beləliklə, tikili sahəsi artır. Amma torpaq sahəsi əvvəl nə qədər olubsa, sonradan da həmin ölçüdə qalır. Bu da torpağın dəyərinin artmasına təsir edən əsas amillərdən biridir".

Onun sözlərinə görə, bundan sonra torpaq qiymətlərinin artıb-artmayacağına gəldikdə isə, bu il üçün proqnozumuz təxminən 20 faiz civarında idi. Amma artıq görünür ki, ayrı-ayrı ərazilərdə qiymət artımının bu göstəricidən də yüksək olması mümkündür:

"Ayrı-ayrı yerlərdə baş verən qiymət artımı hətta nisbətən zəif ərazilərdə yerləşən torpaqların qiymətinə də müsbət təsir göstərir. Çünki daşınmaz əmlak bazarı bir-biri ilə sistemli şəkildə əlaqəlidir. Bölgələrdə həyata keçirilən böyük layihələr və investisiyalar da bu prosesə təsir edir. Regionların inkişafına yönələn diqqət həmin ərazilərə marağı artırır. Turizmin inkişafı da torpaq qiymətlərinin yüksəlməsində mühüm rol oynayır. A-frame evlərin, kotteclərin, restoranların, otellərin və digər istirahət məkanlarının bölgələrdə sayının artması həm onların tikintisi üçün istifadə olunan torpaq sahələrinin, həm də həmin obyektlərə yaxın fərdi yaşayış evləri və torpaqların qiymətinə birbaşa təsir göstərir. Sosial-iqtisadi inkişaf da öz növbəsində torpaq sahələrinə olan tələbi və onların qiymətini artıran amillərdən biridir".

Röyalə Xəyal

Telegramda izləyin