Futboldan sonra küçənin halına baxın!

Fənərbaxçanın Lionla matçından sonra İstanbulun Kadıköy rayonunda, azarkeşlərin sıx toplandığı Yoğurtçu Parkı və ətrafında xoşagəlməz mənzərə yaranıb. Qarşılaşmadan əvvəl və sonra keçirilən qeyd etmələrin ardından əraziyə çoxlu sayda məşəl, plastik butulka və müxtəlif tullantılar atılıb.

Sonxeber.az xarici mediaya istinadla xəbər verir ki, parkın gəzinti yollarında və ağacların ətrafında toplanan zibillər ərazidə çirkli görüntü yaradıb. Xüsusilə istifadə olunan məşəllərin və plastik butulkaların zibil qutularına deyil, birbaşa yerə atıldığı görülüb.

Təmizlik işçiləri gecə saatlarından etibarən ərazidə genişmiqyaslı təmizlik işləri apararaq tullantıları bir-bir toplayıblar. Bildirilir ki, oxşar mənzərələr Fənərbaxçanın demək olar ki, hər ev oyunundan sonra müşahidə olunur.

Matçın yaratdığı coşqunun ardından ortaya çıxan görüntülər azarkeşlərin qeyd etmələrlə yanaşı, ətraf mühitin təmizliyinə də diqqət yetirməsinin vacibliyini göstərib.

Telegramda izləyin