Bu tələbələrə əlavə TƏQAÜD veriləcək - Deputatdan AÇIQLAMA

Ali təhsil müəssisələrinin yüksək nəticə göstərən tələbələr üçün əlavə təqaüd və güzəştlər tətbiq etməsi tələbələrin universitet və ixtisas seçiminə təsir edən amillərdən birinə çevrilir. Məsələn, Azərbaycan Dövlət Pedaqoji Universiteti və Bakı Slavyan Universiteti öz tələbələrinə həvəsləndirici təqaüdlər verəcək.

Bəs, bu cür güzəşt və təqaüd proqramları tələbələrin yüksək nəticə göstərməsinə və müəyyən ixtisaslara marağın artırılmasına nə dərəcədə təsir edir, belə təşviq mexanizmlərinin digər universitetlərdə də tətbiqi ali təhsildə rəqabət və keyfiyyət baxımından nə qədər məqsədəuyğun olardı?
Məsələ ilə bağlı Sonxeber.az-a açıqlama verən Milli Məclisin deputatı Ceyhun Məmmədov bildirib ki, adətən universitetlər bu cür addımlar atırlar və bunun əsas səbəbi daha çox tələbəni öz universitetlərinə cəlb etməkdir:

"Bu, müxtəlif universitetlər tərəfindən davamlı olaraq həyata keçirilən bir yanaşmadır. Bəzi universitetlər adi təqaüdlər təsis edir, bəziləri isə müəyyən məbləğdə təqaüd müəyyənləşdirirlər. Bu mənada hesab edirəm ki, belə təqaüdlərin olması təqdirəlayiqdir. Bu, universitet seçimində müsbət təsir göstərir və tələbələrin təhsil prosesinə daha çox töhfə verməsi baxımından da önəm daşıyır. Ona görə də hər iki universitetin bu addımı yalnız təqdir olunmalıdır".

Deputat bildirib ki, digər universitetlər də bu istiqamətdə addımlar atmalı, müxtəlif təqaüd proqramları həyata keçirməlidirlər:

"Çünki belə təqaüdlər gənclərin universitetlərə cəlb olunması, onların yaxşı oxuması və düzgün seçim etməsi baxımından çox vacibdir. Ən vacib məsələlərdən biri isə bu cür təşəbbüslərin bütün universitetlər tərəfindən həyata keçirilməsidir. Belə olduğu təqdirdə daha yaxşı və müsbət nəticələr əldə etmək mümkündür. Bu da tələbələrin təhsilə marağının artmasına, daha çox çalışmasına və yaxşı nəticələr əldə etmək üçün səy göstərməsinə töhfə verə bilər".

Röyalə Xəyal

Telegramda izləyin