Mətbəx əşyalarına gizlətdikləri qızıl və pulu təyyarədən keçirmək istədilər - VİDEO

Hindistanın paytaxtı Yeni Dehlidəki İndira Qandi Beynəlxalq Hava Limanında gömrük əməkdaşları eyni gün ərzində iki fərqli qaçaqmalçılıq cəhdinin qarşısını alıblar. Sərnişinlərin baqajlarında aparılan yoxlamalar zamanı mətbəx əşyalarının içərisində gizlədilmiş minlərlə dollar və yüzlərlə qram qızıl aşkarlanıb.

Sonxeber.az xarici mediaya istinadla xəbər verir ki, ilk hadisə Dubaya uçmaq üçün hava limanına gələn sərnişinin baqajının yoxlanılması zamanı üzə çıxıb. Rentgen müayinəsində çamadanda şübhəli sıxlıq müəyyən edən gömrük əməkdaşları ətraflı axtarış aparıblar.

Nəticədə çamadanın xüsusi hazırlanmış saxta alt hissəsində və qazan qapağının içərisində ustalıqla gizlədilmiş ümumilikdə 15 min 500 ABŞ dolları aşkarlanıb.

Həmin gün keçirilən ikinci əməliyyatda isə Ər-Riyadda​n Mumbai üzərindən Dehlinin 1-ci terminalına gələn başqa bir sərnişin yoxlanılıb. Şübhəli davranışları səbəbindən saxlanılan şəxsin baqajındakı mətbəx əşyaları diqqətlə araşdırılıb.

Gömrük əməkdaşları qazan qapağının qulpunun mexanizmini sökdükdə onun içərisində gizlədilmiş 15 ədəd olmaqla ümumilikdə 523 qram 24 əyarlı qızıl aşkar ediblər.

Hər iki hadisə ilə bağlı genişmiqyaslı araşdırma başladılıb. Aşkarlanan xarici valyuta və qızıl gömrük mühafizə əməkdaşları tərəfindən müsadirə edilib.

Hadisələr qaçaqmalçıların qiymətli əşyaları gizlətmək üçün gündəlik istifadə olunan mətbəx əşyalarından belə yararlandığını bir daha ortaya qoyub.

Telegramda izləyin