ABŞ 20 milyard dollarlıq Kanada məhsullarına 50 % rüsum tətbiq edib

ABŞ bu gün Kanada istehsalı olan 20 milyard dollar dəyərində məhsullara 50 faiz rüsum tətbiq edib.

"Report" xəbər verir ki, bu barədə "AP" agentliyi məlumat yayıb.

ABŞ Prezidenti Donald Trampın tətbiq etdiyi idxal rüsumları Kanadanın Birləşmiş Ştatlara hər il tədarük etdiyi malların həcminin təxminən 5 %-nə şamil ediləcək.

Kanadanın Baş naziri Mark Karni bəyan edib ki, ölkəsi yerli işçiləri və müəssisələri qorumaq üçün müvafiq rüsumlarla cavab verəcək. O, Vaşinqtonu danışıqları pozmaqda günahlandıraraq ABŞ-nin təklif etdiyi şərtlərdə son anda edilən dəyişikliklərin ədalətsiz və səmərəsiz olduğunu, eləcə də istənilən razılaşmanın etibarlılığını şübhə altına aldığını bildirib.

Cavab tədbirləri ticarət münaqişəsini kəskinləşdirir və Birləşmiş Ştatlar, Kanada və Meksika arasında sənaye üçün həlledici əhəmiyyət kəsb edən Şimali Amerika ticarət sazişinin gələcəyini sual altına qoyur.

Tramp administrasiyasının yüksək vəzifəli rəsmisi bildirib ki, Kanada Trampın polad, alüminium, avtomobil və digər məhsullara tətbiq etdiyi rüsumlarla bağlı güzəştlərə nail olmağa çalışsa da, Birləşmiş Ştatlar bu addımı atmağa hazır deyildi.

Telegramda izləyin