Azərbaycan-Özbəkistan əlaqələri: Tarixi kontekst,sıxılan əllər, örnək model

Azərbaycan-Özbəkistan münasibətləri qədim tarixə malikdir. Son illərdə Azərbaycanın qarşılıqlı münasibətləri daha da dərinləşdirdiyi dövlətlərdən biri Özbəkistandır. İki ölkə münasibətləri tarixi, milli və mədəni yaxınlığa əsaslanır.

Mövzu ilə bağlı Sonxeber.az-a açıqlama verən siyasi şərhçi Kazım Kazımov bu əlaqələrin əhəmiyyətindən danışıb:

"Azərbaycan və Özbəkistan arasında münasibətlər hələ Sovet İttifaqı dövründə mövcud olmuşdur. Çünki hər iki ölkə SSR-nin müttəfiq respublikalarından olmuşdur. 1991-ci ildə Sovet İttifaqı dağıldıqdan sonra Azərbaycan və Özbəkistan müstəqil ölkələrə çevrildilər və ilk təmaslar 1995-ci ildə qurulmuşdur. O dövürdən bu tərəfə əlaqələr inkişaf etmişdir. Lakin son illərdə Azərbaycan-Özbəkistan arasında münasibətlər klassik ölkələrarası münasibətdən çox artıq müttəfiqliyə ,strateji tərəfdaşlığa çevrilmişdir. Bunun isə bir çox səbəbləri var, birincisi Azərbaycanın 2000-ci illərin əvvəllərindən sürətli inkişafı, dinamik xarici siyasət yürütməsi Azərbaycanı keçmiş sovet ölkələri arasında institusional inkişaf modelini quran və dünyada müəyyən bir orta güc səviyyəsinə çatdıran ölkələrin birinə çevirdi. Və Özbəkistan da indi 2010-cu ilin sonlarından etibarən bu yolu tutmuşdur. Sürətli inkişaf modelini Özbəkistan indi həyata keçirir və Azərbaycan həm keçmiş sovet mirası, həm türk dünyasının bir üzvü olması və Azərbaycanın coğrafi olaraq bu qədər Mərkəzi Asiyaya yaxın bir regionda örnək inkişaf ortaya qoymağı şübhəsiz ki, Orta Asiya ölkələri üçün də bir rol model olmuşdur".

Politoloq iki dost ölkə arasında milli maraqların əsas vacib amil olduğunu xüsusi olaraq diqqətə çatdırdı:
"Əlbəttə ki,burada milli maraqlar söhbəti var ki Mərkəzi Asiya, ələlxüsus Özbəkistan -Azərbaycan üçün mühüm bazardır. Bugün biz Özbəkistan-Azərbaycan arasında əlaqələrin, iqtisadi əlaqələrin nə qədər dərinləşdiyini görürük. Loqistika, tranzit əlaqləri dərinləşir, habelə Mərkəzi Asiya üçün Azərbaycan Cənubi Qafqaza və Avropaya çıxışdır. Mən hesab edirəm ki,bütün bu səbəblər tarixi, dini, milli, etnik, yaxınlıq və habelə coğrafi yaxınlıq və hər iki ölkənin artıq yeni dövrə, XXI əsrdə sürətli inkişaf modelini tətbiq etməsi ölkələrimiz arasında klassik əlaqələri stratejik əlaqələrə müttəfiqlik səviyyəsinə yüksəltmişdir"

Lalə Məmmədova

Telegramda izləyin