Azərbaycan və Özbəkistan: sarsılmaz dostluq, möhkəm qardaşlıq və strateji tərəfdaşlıq

Prezident İlham Əliyevin 23 avqustda Özbəkistana dövlət səfəri iki ölkə arasında strateji tərəfdaşlığın yeni mərhələsini formalaşdırdı. Azərbaycan Respublikasının Prezidenti İlham Əliyevin avqustun 23-də Özbəkistana dövlət səfəri Azərbaycan-Özbəkistan münasibətlərinin sürətlə inkişaf etdiyini bir daha nümayiş etdirdi. Daşkənddə Prezident İlham Əliyev ilə Prezident Şavkat Mirziyoyev arasında görüş keçirildi, Ali Dövlətlərarası Şuranın üçüncü iclası baş tutdu, mühüm sənədlər imzalandı və iki ölkə arasında "əbədi dostluq haqqında Müqavilə" rəsmiləşdirildi.

Səfərin mühüm siyasi hadisələrindən biri Şavkat Mirziyoyevin Azərbaycan ilə Özbəkistan arasında dostluq, qardaşlıq və müttəfiqlik əlaqələrinin inkişafında xüsusi xidmətlərinə görə "Heydər Əliyev" ordeni ilə təltif edilməsi oldu.

Tarixi sənəd - əbədi dostluq müqaviləsi

23 avqustda Prezident İlham Əliyev və Prezident Şavkat Mirziyoyev "Azərbaycan Respublikası ilə Özbəkistan Respublikası arasında əbədi dostluq haqqında Müqavilə"ni imzaladılar.
Bu sənəd iki ölkə arasındakı münasibətlərin gələcək inkişafı üçün mühüm siyasi-hüquqi çərçivə yaradır. Müqavilənin imzalanması Azərbaycan və Özbəkistanın bir-birinə münasibətdə strateji əhəmiyyət verdiyini və uzunmüddətli əməkdaşlıq kursuna sadiq olduğunu göstərir.

İqtisadi əməkdaşlıqda konkret hədəflər

Səfər çərçivəsində iki ölkənin ticarət dövriyyəsinin 2030-cu ilədək 1 milyard ABŞ dollarına çatdırılması üzrə Proqram mübadilə edildi.Bununla yanaşı, investisiyalar və ticarət sahələrində layihələrin həyata keçirilməsi üzrə Yol Xəritəsi də təqdim edildi. Bu sənədlər qarşılıqlı investisiyaların artırılması və biznes əlaqələrinin daha da genişləndirilməsi üçün yeni imkanlar açır.

Azərbaycan şirkətlərinin Özbəkistanda həyata keçirdiyi layihələrin sayı da artır. 23 avqustda "Davr Bank", gips zavodu və STEAM məktəblərinin açılışı, SOCAR-ın yeni yanacaqdoldurma məntəqələri, "Sea Breeze Uzbekistan", "Baku City", mədən emalı və kənd təsərrüfatı layihələrinin təməlqoyma mərasimləri keçirildi.

Əməkdaşlığın yeni coğrafiyası

Azərbaycan və Özbəkistan arasında əməkdaşlıq artıq yalnız paytaxtlar səviyyəsində deyil, şəhərlər və regionlar arasında da genişlənir. Xankəndi ilə Ürgənc, Naxçıvan ilə Ürgənc, Laçın ilə Buxara arasında qardaşlaşma münasibətlərinin qurulmasına dair protokolların imzalanması bu baxımdan əlamətdardır.
Bu münasibətlər turizm, mədəniyyət, təhsil, şəhərsalma və sosial-humanitar layihələr üçün yeni imkanlar formalaşdıra bilər.

Təhsil və mədəniyyət körpüləri

Daşkənddə Nizami Gəncəvi adına Milli Pedaqoji Universitetin açılışında iki ölkə prezidentinin iştirakı Azərbaycan-Özbəkistan humanitar əlaqələrinin xüsusi əhəmiyyətini göstərdi. Eyni zamanda mədəniyyət sahəsində əməkdaşlıq haqqında saziş mübadilə edildi. Bu istiqamət xalqlarımızın ortaq tarixi və mədəni irsinin gələcək nəsillərə çatdırılması baxımından mühüm rol oynayacaq.

Qarabağın bərpasında qardaş Özbəkistanın rolu

Özbəkistanın Azərbaycanın işğaldan azad edilmiş ərazilərinin bərpasına verdiyi dəstək münasibətlərin xüsusi nümunəsidir. Füzulidə məktəb, Xankəndidə tikiş fabriki kimi layihələr Azərbaycan-Özbəkistan əməkdaşlığının sosial mahiyyətini nümayiş etdirir. Xankəndidəki birgə tikiş fabriki layihəsinin ümumi investisiya dəyəri 11 milyon manatdır və burada 800 iş yerinin yaradılması nəzərdə tutulur.Bu əməkdaşlıq Azərbaycanın Böyük Qayıdış siyasətinə və Qarabağın sosial-iqtisadi inkişafına dost və qardaş Özbəkistanın verdiyi konkret töhfədir.

"Azərbaycan" parkı - dostluğun yeni rəmzi

Yeni Daşkənd şəhərində "Azərbaycan" parkının təməlinin qoyulması iki ölkə arasındakı münasibətlərin simvolik ifadələrindən biridir. Parkın yaradılması Azərbaycan xalqının və dövlətinin Özbəkistanda yüksək ehtiramla qarşılandığını, iki xalqın dostluq və qardaşlıq bağlarının ictimai məkanda da yaşadıldığını nümayiş etdirir.

Yeni mərhələnin əsas xüsusiyyəti

23 avqust səfərinin ən mühüm xüsusiyyəti ondan ibarətdir ki, Azərbaycan-Özbəkistan münasibətlərində siyasi bəyanatlardan konkret layihələrə keçid daha da sürətlənir.Əbədi dostluq müqaviləsi siyasi-hüquqi bazanı möhkəmləndirir, ticarət və investisiya sənədləri iqtisadi hədəfləri müəyyənləşdirir, mədəniyyət və turizm sazişləri humanitar əlaqələri genişləndirir, şəhərlər arasında qardaşlaşma protokolları isə münasibətləri xalqların gündəlik həyatına daha da yaxınlaşdırır.

Beləliklə, 23 avqust 2026-cı il Azərbaycan-Özbəkistan münasibətlərində yeni tarixi mərhələnin başlanğıcı kimi qiymətləndirilə bilər. Prezident İlham Əliyevin dövlət səfəri və Prezident Şavkat Mirziyoyevin "Heydər Əliyev" ordeni ilə təltif edilməsi iki ölkə arasında qarşılıqlı etimadın və siyasi həmrəyliyin yüksək səviyyəsini nümayiş etdirdi.
Bu münasibətlərin gələcək inkişafı üçün artıq möhkəm siyasi iradə, hüquqi baza, iqtisadi layihələr və xalqlar arasında səmimi dostluq mövcuddur. Azərbaycan və Özbəkistanın qarşıdakı illərdə bu möhkəm təməl üzərində əməkdaşlığı daha da genişləndirəcəyi, Türk dünyasında həmrəyliyə və regional əməkdaşlığa mühüm töhfələr verəcəyi gözlənilir.

Jalə Əliyeva
Milli Məclisin deputatı

Telegramda izləyin