Zəhərli otlar mal-qaranı tələf etdi: "Əli bıçaq tutan hər kəs bura gəlsin"

Türkiyənin Çorum vilayətində heyvanlarını otlaq sahəsində otaran vətəndaş dəhşətli hadisə ilə üzləşib. Zəhərli otları yeyən mal-qara qısa müddət ərzində bir-birinin ardınca yerə yıxılmağa başlayıb.

Sonxeber.az xarici mediaya istinadla xəbər verir ki, hadisəni görən heyvandar böyük panikaya düşüb. Sürünün təxminən yarısının tələf olduğunu görən vətəndaş sağ qalan, lakin vəziyyəti ağır olan heyvanları xilas etmək üçün vaxtla yarışıb.

Heyvanların tələf olmadan kəsilməsini təmin etmək istəyən heyvandar ətrafdakı insanlardan kömək istəyib. O, hadisənin şoku ilə "Əli bıçaq tutan hər kəs bura gəlsin, inəkləri kəsək" deyərək ətrafdakıları köməyə çağırıb.

Hadisə yerinə gələn vətəndaşların və aidiyyəti əməkdaşların köməyi ilə sağ qalan heyvanlarla bağlı təcili tədbirlər görülüb.

İnsidentlə bağlı araşdırmaya başlanılıb. Zəhərlənməyə səbəb olan otların növünün və heyvanların ölümünə hansı maddənin səbəb olduğunun müəyyənləşdirilməsi üçün araşdırmalar davam edir.

Telegramda izləyin