Bu ərazidə əmlak qiymətləri UCUZLAŞIR: Alıcı niyə yoxdur?

Güclü yağışlar zamanı su basan və nəqliyyat imkanları məhdud olan ərazilərdə fərdi evlərə tələbin azalması əmlak qiymətlərinə də təsir göstərə bilər. Xüsusilə təkrar daşqınlar, infrastruktur problemləri və əraziyə çıxışın çətinliyi alıcıların seçimində risk amili kimi nəzərə alınır.

Bəs, daşqın riski, nəqliyyat əlçatanlığının zəifliyi və digər infrastruktur problemləri belə ərazilərdə evlərin bazar dəyərinə nə dərəcədə təsir edir və bu amillər qiymətlərin uzunmüddətli ucuzlaşmasına səbəb ola bilərmi?
Mövzu ilə bağlı Sonxeber.az-a açıqlama verən əmlak məsələləri üzrə ekspert Elnur Azadov bildirib ki, bu il yaz aylarında intensiv yağışlar nəticəsində bəzi ərazilərin su basması həmin zonalara olan tələbatın kəskin azalmasına səbəb olub.

"Demək olar ki, hazırda həmin ərazilərdə nə torpaq, nə də ev alan var. İstisna olaraq, büdcəsi məhdud olan və regionlardan gələn şəxslər tərəfindən ayrı-ayrı hallarda maraq göstərilir. Hətta həmin ərazilərdə evlərin qiymətləri təxminən 50 faizədək aşağı düşsə də, bu, alıcılar üçün onları cəlbedici etməyib. İndi isə payız yaxınlaşır və qarşıdakı dövrdə yağıntıların yenidən həmin ərazilərdə vəziyyətə necə təsir edəcəyi müəyyənləşəcək".

Ekspert bildirib ki, belə ərazilərdə evlərin uzun müddət satılmaması, sözsüz ki, qiymətlərə ciddi təsir göstərir:

"Bununla belə, düşünürəm ki, bu məsələ əsasən bu ilin gündəmində olacaq. Əgər növbəti illərdə həmin ərazilərdə analoji hallar təkrarlanmasa, problem tədricən unudula bilər və oradakı evlər də zamanla satılmağa başlayar. Xüsusilə büdcəsi məhdud olan və regionlardan gələn şəxslərin belə evlərə maraq göstərməsi mümkündür".

Röyalə Xəyal

Telegramda izləyin