Təmirdən sonra "28 May" və "Nizami" stansiyalarında bu YENİLİKLƏR olacaq - AÇIQLAMA

Bakı Metropolitenində "Qırmızı" və "Yaşıl" xətlərin ayrılması layihəsi çərçivəsində hazırda "28 May"-"Nizami" sahəsində qatarların hərəkəti müvəqqəti dayandırılıb. Layihənin əsas məqsədlərindən biri xətlərin müstəqil fəaliyyətini təmin etməklə qatarların hərəkət intensivliyini artırmaq və sərnişin sıxlığını azaltmaqdır.

Bəs, layihə başa çatdıqdan sonra "28 May" və "Nizami" stansiyaları arasında birbaşa metro əlaqəsi bərpa olunacaqmı, qatarların hərəkət sxemi necə təşkil ediləcək və xətlərin ayrılması sərnişin sıxlığının və gözləmə müddətinin azalmasına nə dərəcədə imkan verəcək?
Mövzu ilə bağlı Sonxeber.az-a açıqlama verən nəqliyyat eksperti Aslan Əsədov bildirib ki, xətlərin ayrılması prosesi baş verəcəksə, bu, gözlənilən və müsbət haldır.

"Bu prosesin həyata keçirilməsi ilə metroda hərəkətin təşkili, qatarlararası intervalların azaldılması və digər prosedurların daha səmərəli həyata keçirilməsi mümkün olacaq. Burada təkcə "28 May" və "Nizami" stansiyaları arasındakı tunellərin ayrılması nəzərdə tutulmur. Eyni zamanda "İçərişəhər" stansiyasında geridönmə kamerasının quraşdırılması ilə bağlı tikinti işləri də aparılır. Bu proseslər paralel şəkildə həyata keçirilir və onların eyni vaxtda başa çatdırılması gözlənilir".

Ekspert bildirib ki, xətlərin ayrılmasından sonra "İçərişəhər"dən "Həzi Aslanov" istiqamətində birbaşa hərəkətin təşkili ilə bağlı da gözləntilər var:

"Həmçinin "Xətai" stansiyasına qədər xəttin açılması imkanları da nəzərdən keçirilir. Bir sözlə, bu layihələr həyata keçirildikcə Bakı metrosunun infrastrukturu tədricən sovet dövründən qalan mövcud sistemdən daha müasir metro şəbəkəsinə çevriləcək. Bu, kifayət qədər mühüm və böyük əhəmiyyət daşıyan prosesdir. Eyni zamanda, qatarlararası intervalın azaldılması sərnişin sıxlığının və gözləmə müddətinin aşağı salınmasına əhəmiyyətli təsir göstərəcək. Bu baxımdan prosesin müsbət nəticə verəcəyi gözlənilir".

Röyalə Xəyal

Telegramda izləyin