Bu ixtisas üzrə plan yerləri AZALDI: Əmək bazarına necə təsir edəcək?

Bir sıra universitetlərdə 2026/2027-ci tədris ili üçün xarici dil müəllimliyi üzrə plan yerlərinin azaldılması diqqət çəkir. Bu dəyişiklik əmək bazarındakı tələbatın gələcəkdə necə formalaşacağı ilə bağlı suallar yaradır. Eyni zamanda, plan yerlərinin müəyyənləşdirilməsində məzunların məşğulluğu, müəllim ehtiyacı və abituriyentlərin ixtisasa marağı kimi amillər də nəzərə alına bilər.

Bəs, xarici dil müəllimliyi üzrə plan yerlərinin azaldılması əmək bazarında bu kadrlara tələbatın azalması ilə nə dərəcədə bağlıdır, universitetlər belə qərarları hansı meyarlar əsasında verir və bu tendensiya gələcəkdə xarici dil müəllimi çatışmazlığına səbəb ola bilərmi?
Mövzu ilə bağlı Sonxeber.az-a açıqlama verən təhsil eksperti Məzahir Məmmədli bildirib ki, 2026-2027-ci tədris ili üçün qəbul planının artırılması nəzərdə tutulurdu. Belə bir gözlənti var idi ki, plan yerlərinin sayı 65 minə çatdırılacaq. Lakin bu il üçün ayrılan plan yerlərinin sayı təxminən 61 min oldu.

"Ümumi göstəriciyə baxdıqda görürük ki, pedaqoji kadr hazırlayan universitetlərdə plan yerlərində ciddi artım baş verməyib. Əksinə, Qızlar Universitetinin fəaliyyəti dayandırılıb, Naxçıvan Müəllimlər İnstitutu isə bu il qəbul aparmayıb. Bu da təxminən 1000-ə yaxın pedaqoji kadr hazırlığı üzrə plan yerinin digər universitetlərə yönəlməsi deməkdir. Amma düşünmürəm ki, bu dəyişiklik yaxın müddətdə əmək bazarına ciddi təsir göstərəcək. Çünki hər il müəllimlərin işə qəbulu imtahanlarında on minlərlə şəxs iştirak edir, halbuki vakant yerlərin sayı müraciət edənlərin sayından təxminən 10 dəfə az olur".

Ekspert bildirib ki, bu baxımdan, xüsusilə müəllimlik ixtisasları üzrə plan yerlərinin, o cümlədən xarici dil müəllimliyi üzrə yerlərin yaxın vaxtlarda əhəmiyyətli dərəcədə azaldılması gözlənilmir:

"Çünki hazırda xüsusilə ingilis dili müəllimlərinə tələbat var. Digər tərəfdən, xarici dil üzrə sertifikasiya imtahanlarında uğursuz nəticə göstərən müəllimlərin sayının çox olması da bu sahədə əlavə kadrlara ehtiyac yarada bilər. Həmin vakant yerlərin gələcəkdə yeni müəllimlərlə doldurulması mümkündür. Ona görə də hesab edirəm ki, pedaqoji ixtisaslar üzrə, xüsusilə xarici dil müəllimliyi istiqamətində plan yerlərinin bu mərhələdə azaldılmasının əmək bazarına ciddi mənfi təsir göstərəcəyi gözlənilmir".

Röyalə Xəyal

Telegramda izləyin