Bu təhlükəsizlik qaydalarına əməl etmək həyatınızı XİLAS EDƏCƏK

Ev təmiri zamanı, xüsusilə dam, eyvan və digər hündürlüklərdə aparılan işlərdə yıxılma ciddi xəsarət və ölüm riski yaradır. Bu riskin qarşısını almaq üçün işə başlamazdan əvvəl hündürlükdə təhlükəli sahələr müəyyənləşdirilməli, mümkün olduqda qoruyucu məhəccər və təhlükəsizlik baryerləri quraşdırılmalı, işçi isə uyğun fərdi mühafizə vasitələri ilə təmin edilməlidir.

Bəs, damda, eyvanda və digər hündürlüklərdə təmir aparan şəxslər hansı təhlükəsizlik qaydalarına və qoruyucu vasitələrə əməl etməlidirlər və belə işlər zamanı təhlükəsizliyə nəzarət kim tərəfindən və necə həyata keçirilməlidir?
Mövzu ilə bağlı Sonxeber.az-a açıqlama verən təhlükəsizlik məsələləri üzrə ekspert Samir Nəbiyev bildirib ki, hündürlükdə işlə bağlı Fövqəladə Hallar Nazirliyinin müvafiq qərarı var və Azərbaycanda bu istiqamətdə hüquqi-normativ baza mövcuddur:

"Hündürlükdə iş zamanı həm fərdi, həm də kollektiv mühafizə vasitələrindən istifadə edilməlidir. Bunlara təhlükəsizlik torları, təhlükəsizlik kəmərləri və digər mühafizə vasitələri daxildir. Tətbiq olunan təhlükəsizlik tədbirləri işin görüldüyü əraziyə və mövcud risklərə görə dəyişir. Məsələn, dam üzərində iş aparılırsa, təhlükəsizlik xətti, yəni tros çəkilməli, ankerlə möhkəmləndirilməli və təhlükəsizlik kəməri həmin trosdan bərkidilməlidir. İşçi ayaqaltı, sənaye iskələsi və ya digər hündürlükdə işləmə vasitəsindən istifadə edirsə, təhlükəsizlik kəməri müvafiq konstruksiyaya bərkidilməlidir".

Ekspert bildirib ki, nərdivanlardan istifadə zamanı da müəyyən təhlükəsizlik qaydalarına əməl olunmalıdır:

"A tipli nərdivanlarda işləmək mümkündür, lakin söykəmə tipli nərdivanlardan iş aparmaq məqsədilə istifadə etmək olmaz. Burada "üç nöqtə prinsipi"nə riayət edilməlidir. Yəni işçi nərdivanda hərəkət edərkən eyni anda iki əlini və bir ayağını, yaxud iki ayağını və bir əlini dayaqlayaraq sabitliyini qorumalıdır. Həmçinin alət və avadanlıqlar əllə daşınmamalıdır. Onların digər vasitələrlə, məsələn, səbət, kran və ya kəndir vasitəsilə yuxarı qaldırılması daha təhlükəsiz hesab olunur. Ümumilikdə, hündürlükdə iş zamanı təhlükəsizlik tədbirləri işin xarakterindən və ərazidəki risklərdən asılı olaraq müəyyənləşdirilməlidir. Troslardan, təhlükəsizlik kəmərlərindən və kollektiv mühafizə vasitələrindən düzgün istifadə iş zamanı bədbəxt hadisələrin qarşısının alınması baxımından mühüm əhəmiyyət daşıyır".

Röyalə Xəyal

Telegramda izləyin